Беларусдаги мухолифат раҳбари Светлана Тихановская ОМОН ва Уюшган жиноятчилик ва коррупцияга қарши курашиш бош бошқармасини террористик ташкилотлар деб тан олишни талаб қилмоқда. Бу ҳақда у Нидерландия ташқи ишлар вазири Стефан Блок билан учрашувда айтиб ўтди, деб хабар берди Тихановскаянинг Telegram канали.
Сиёсатчи хавфсизлик кучларига қарши санкцияларни жорий этишга чақирди.
«Улар жиноий тўдаларга айлангани сабабли биз ушбу ташкилотларни экстремистик ёки террористик деб тан олиш тартибини бошлаймиз», – деди Тихановская.
Тихановскаянинг таъкидлашича, халқ томонга ўтадиган хавфсизлик ходимлари амнистияга умид қилишлари мумкин.
Унинг сўзларига кўра, Беларусда хавфсизлик кучларининг ҳаракатлари тобора кенгайиб бормоқда.
«Аввалига улар кўчада одамларни тўхтатиб қолишди. Кейин квартираларга бостириб киришни бошлади. Энди улар тўғридан-тўғри оилаларга босим ўтказиб, намойишчиларнинг болалари ижтимоий хавфли вазиятда эканини эълон қилиш билан қўрқитишди.
Шунинг учун биз Беларусь халқига қарши жиноятлар тўғрисидаги далилларни рўйхатга олиш тизимини яратяпмиз. Бу ҳамма тўлдириши мумкин бўлган ва режим шерикларининг санкциялар ҳамда суд жараёнларига бевосита олиб келадиган ягона далил базаси бўлади», – деди Тихановская.
Мавзуга доир: Беларусда умуммиллий иш ташлаш бошланди. Унга давлат корхоналари, ОТМлар, дўкон ва кафелар ҳам қўшилди
Тихановская, шунингдек, Европа Иттифоқидан Беларусга қарши санкцияларни кенгайтиришни сўради.
Аввалроқ Александр Лукашенко Беларусдаги намойиш қатнашчиларини терроризм йўлига ўтганликда айблаганди.
Изоҳ (0)