UFC reytingni yangiladi: Hamzat Chimayev ilk bor reytingdan joy oldi, dos Anyos qaytdi, Islom Maxachevda esa pasayish

UFC matbuot xizmati promoushen jangchilarining yangilangan reytingini e’lon qildi.

Umumiy reyting o‘zgarishsiz qoldi. Uni hamon yengil vazn chempioni Habib Nurmagomedov boshqarib bormoqda.

Kelib chiqishi chechenistonlik bo‘lgan Hamzat Chimayev ilk bor reytingdan o‘rin oldi. Hozirda Shvetsiya nomidan harakat qilayotgan yakkakurashchi yarim o‘rta vazn divizioni reytingining 15-pog‘onasiga joylashdi.

Shuningdek, ushbu vazn toifasida Tayron Vudli bir pog‘ona yuqorilab (6) Demian Mayyadan (7) o‘zib ketgan bo‘lsa, Entoni Pettis (12) bir yo‘la ikki pog‘ona yuqoriladi. Shuningdek, Chimayev qatorida Bilol Muhammad (13) ham reytingdan joy oldi.

UFC’ning 15-noyabr kungi musobaqasida g‘alaba qozongan Rafael dos Anyos yengil vazn reytingiga qaytdi va 7-o‘ringa joylashdi. Bu esa ko‘pchilik qatori rossiyalik yakkakurashchi Islom Maxachevning bir pog‘ona pastlashiga sabab bo‘ldi. Endilikda Islom 13-o‘rinda bormoqda.

Barcha vazn toifalari reytingi bilan ushbu havolada tanishish mumkin.

Eslatib o‘tamiz, Chimayev navbatdagi jangini 19-dekabr kuni reytingning uchinchi raqamli vakili Leon Alvaresga qarshi o‘tkazadi. Bu g‘alaba Hamzatni chempion Kamaru Usmonga qarshi jangga yaqinlashtirishi mumkin.