Turkmaniston Rossiyaga pandemiya sharoitida qiymati qariyb 1 million dollarlik gumanitar yordam yubordi. “TASS”ning xabar berishicha, bu haqda Rossiya tashqi ishlar vazirining o‘rinbosari Andrey Rudenko Federatsiya kengashining Xalqaro ishlar qo‘mitasi yig‘ilishida ma’lum qildi.
“Turkmaniston, ehtimol, pandemiya davrida Rossiyaga gumanitar yordam ko‘rsatgan Markaziy Osiyodagi yagona davlatdir”, — deb ta’kidlagan Rudenko.
Uning aytishicha, oziq-ovqat, neft mahsulotlari va boshqa narsalardan iborat katta yuk Astraxanga jo‘natilgan.
Rudenkoning ta’kidlashicha, ikki davlat o‘rtasidagi munosabat ijobiy dinamikani namoyon etmoqda, bu esa tovar aylanmasi o‘sishida aks etmoqda.
Rossiya TIV saytida ma’lum qilinishicha, og‘irligi qariyb 1000 tonna bo‘lgan gumanitar yuk Rossiya tomoniga davlatlar o‘rtasidagi strategik sherikchilik tamoyillariga asoslangan hamkorlik doirasida topshirildi.
Xususan, turkman mollari, shu jumladan, to‘qimachilik, qurilish materiallari, oziq-ovqat mahsulotlari bilan yordam ko‘rsatilgan.
“Rossiya tomon Turkmanistonning yangi koronavirus infeksiyasi pandemiyasi tufayli yuzaga kelgan hozirgi og‘ir vaziyatda juda muhim bo‘lgan ushbu do‘stona va yaxshi qo‘shnichilik munosabati uchun chuqur minnatdor”, — deyiladi Rossiya TIV bayonotida.
Vazirlikning qo‘shimcha qilinishicha, jo‘natilgan mahsulotlar tibbiyot muassasalariga yuboriladi. U birinchi navbatda koronavirusga qarshi kurash bilan jalb etilgan muassasalarga, shuningdek, xavf guruhidagi fuqarolarni ijtimoiy qo‘llab-quvvatlovchi tashkilotlarga kelib tushadi.
Eslatib o‘tamiz, aprel oyida O‘zbekiston Rossiyaga gumanitar yordam sifatida 5 million dona tibbiy niqob yuborgandi.
Izoh (0)