Filippinlik politsiyachi reyd davomida halok bo‘ldi. Uni jangari xo‘roz o‘ldirgan

Filippinda xo‘roz urishtirish o‘yinlariga qarshi o‘tkazilgan reyd fojiali yakun topdi: xo‘rozlardan biri Kristian Bolok ismli politsiyachining son arteriyasini kesib yuborib, uning o‘limiga sababchi bo‘ldi. Uning panjasiga qotirilgan lezviya qotillik quroliga aylangan, deb yozadi Esquire.

Zudlik bilan shifoxonaga olib borilgan ofitser u yerda vafot etgan.

“Yurakda chuqur og‘riq bilan xizmat vazifasini o‘tash chog‘ida ukamizdan ayrilganimizni ma’lum qilaman. Filippin milliy politsiyasi leytenant Bolokning bevaqt o‘limidan qayg‘uda va uning qarindoshlari hamda yaqinlariga hamdardlik bildiradi”, — deydi Shimoliy Samar provinsiyasi politsiya direktori Arnel Apud.

“Bu haqda birinchi bor aytishganida ishona olmadim. Politsiyadagi 25 yillik faoliyatim davomida birinchi bor jangchi xo‘rozning lezviyasi oqibatida politsiya bir insondan ayrildi”, — deya qo‘shimcha qiladi u.

Aholining shikoyatlaridan kelib chiqib, politsiya 26-oktabr kuni noqonuniy xo‘roz jangini uyushtirgan uch erkakni hibsga olgan. Qolganlar esa turli yo‘nalish bo‘ylab qochib ketgan.

Politsiyachilar hibsga olingan uch nafar erkakdan tashqari, yana uch qoidabuzarning shaxsni aniqlagan bo‘lib, hozirda ular ozodlikda qolmoqda. Shuningdek, yettita jangari xo‘roz, ikkita lezviya jamlanmasi va pullar musodara qilingan.