Toshkent viloyati Toshkent tumanida olib borilayotgan obodonlashtirish va qayta qurish ishlari munosabati bilan ayrim avtomobil yo‘llarida avtomototransport vositalarining harakati vaqtinchalik to‘xtatilmoqda. Bu haqda “Daryo”ga Toshkent viloyati IIBB YHXB axborot xizmati ma’lum qildi.
Foto: “Daryo”
Xabar berilishicha, avtomobil yo‘llarida olib borilayotgan rekonstruksiya ishlari munosabati bilan, Toshkent tuman hokimining qaroriga asosan 26-oktabr kech soat 00:00 dan boshlab ta’mirlash ishlari tugaguniga qadar 4R-4 Toshkent shahri—Keles shahri—Qozoqkentsoy qishlog‘i—M39 avtoyo‘li (820-kilometr avtomobil yo‘lining 0–2-kilometrlari yopiladi. Ya’ni yo‘lning Keles ko‘prigidan 9-son umumta’lim maktabi oldigacha bo‘lgan qismida transport vositalari harakati vaqtinchalik to‘liq to‘xtatiladi.
Ushbu yo‘nalishda harakatlanadigan avtomototransport vositalarining harakati vaqtinchalik tumanning Hasanboy qishlog‘i hududidan o‘tgan 4N-699 hamda M.Fozilov jamoa xo‘jaligi hududidan o‘tgan 4R-4 avtomobil yo‘llari hamda 4K-708a avtomobil yo‘li orqali tashkil etiladi.
“Toshkent viloyati IIBB YHXB yuzaga kelgan noqulay vaziyat uchun harakat ishtirokchilaridan uzr so‘ragan holda YPX inspektorlari tomonidan ko‘rsatiladigan yo‘nalishlar bo‘yicha harakatlanishga, tartib intizom saqlashga hamda harakatlanish xavfsizligini ta’minlashga hissa qo‘shishga chaqiradi. Yo‘l ochilganligi to‘g‘risida alohida ma’lumot beriladi”, — deyiladi xabarda.
