Andijon shahar hokimi Bahrom Haydarovning noqonuniy qarorlari bekor qilindi. Bu haqda Adliya vazirligi axborot xizmati xabar berdi.

Foto: “Daryo”

Ma’lum qilinishicha, Andijon shahar adliya bo‘limi tomonidan shu yilning 5-oktabrida ijtimoiy tarmoqlarda (“Soyadagi siyosatchilar” va “Muxbir Daliyev” Telegram kanali) “Andijon shahar hokimligi chiqarayotgan qarorlar qanchalik qonuniy?” nomli maqolasi o‘rganib chiqilgan.

Xususan, maqolada Andijon shahar hokimining 2020-yil 11-sentabrdagi 403-q-son qarori bilan Andijon shahar 2-tor X.Niyoziy ko‘chasi 5-uyda yashovchi fuqaro Ro‘ziyev Mansurbekka 6-tor X.Niyoziy ko‘chasi 14-maydon 200 kvadrat metrdan iborat yer maydoni yakka tartibda uy-joy qurish uchun amaldagi qonun hujjatlariga zid ravishda ajratib berilgani ko‘rsatilganligi bayon etilgan.

O‘rganish davomida Andijon shahar hokimi 2020-yil 11-sentabrda 403-q-son qarori bilan Andijon shahar 2-tor X.Niyoziy ko‘chasi 5-uyda yashovchi fuqaro Mansurbek Ro‘ziyevga shahar hokimligi zaxirasida bo‘lgan 6-tor X.Niyoziy ko‘chasi 14-maydon 200 kvadrat metrdan iborat yer maydoni yakka tartibda uy-joy qurish uchun auksionsiz ajratib berilganligi aniqlangan. Bu Yer kodeksining 7-moddasi hamda Vazirlar Mahkamasining 2019-yil 28-yanvardagi 63-son qarori bilan tasdiqlangan “Yakka tartibda uy-joy qurish uchun yer uchastkalari berish va yer uchastkalariga meros qilib qoldiriladigan umrbod egalik qilish huquqini realizatsiya qilish tartibi to‘g‘risida”gi nizom talablariga zid hisoblanadi.

Ushbu holat bo‘yicha shahar hokimining 2020-yil 11-sentabrdagi qonun hujjatlariga zid bo‘lgan 403-q-son qaroriga nisbatan protest keltirish uchun Andijon shahar prokuraturasiga 8-oktabr kuni 1-60/11-7/418-sonli taklif kiritilgan.

Andijon shahar prokuraturasi tomonidan adliya bo‘limi taklifi ko‘rib chiqilib, hokimlikka 13-oktabrda 10.2/273-q-20-sonli protesti kiritilgan. Bundan tashqari, Andijon viloyat adliya boshqarmasi tomonidan shahar hokimi nomiga yuqoridagi qarorni bekor qilishni so‘rab, 12-oktabrda 06-02-13/35-sonli taqdimnoma kiritilgan.

Andijon shahar hokimligi tomonidan viloyat adliya boshqarmasining taqdimnomasi hamda shahar prokurorining protesti asosida 19-oktabrdagi 444-q-son qarori bilan shu yilning 11-sentabrdagi qonun hujjatlariga zid bo‘lgan 403-q-son qarori bekor qilingan.

Eslatib o‘tamiz, qishloq xo‘jaligiga mo‘ljallanmagan bo‘sh turgan yer uchastkalarini berish hamda arixitektura-qurilish ishlarini amalga oshirish tartib-taomillarini yanada takomillashtirish chora-tadbirlari to‘g‘risidagi Prezident qaroriga ko‘ra, Qoraqalpog‘iston Respublikasi Vazirlar Kengashi raisi, hokimlarning auksion g‘olibi nomiga yer uchastkasini ajratish bo‘yicha qaror qabul qilishi to‘g‘risidagi talab bekor qilingan.