Eron mamlakat hududiga Qorabog‘dan kelib tushgan jangovar snaryadlarga munosabat bildirishga va’da berdi

Eron Tog‘li Qorabog‘dagi nizolar tufayli uning chegaraga yaqin hududlariga kelib tushayotgan jangovar snaryadlarga nisbatan javob munosabatini bildiradi. Bu haqda mamlakat Tashqi ishlar vazirligi vakili Said Xatibzoda ma’lum qildi, deb yozadi “RBK”.

“Eron Islom Respublikasi buni e’tiborsiz qoldirmaydi”, — dedi TIV vakili.

Uning aytishicha, nizo hududiga chegaradosh joylarda yashaydigan Eron fuqarolarining xavfsizligi mamlakat qurolli kuchlari uchun birlamchi omillardan biridir.

Xatibzodaning ta’kidlashicha, o‘tgan kun mobaynida mamlakatning chegaradosh hududlariga bir nechta jangovar raketalar kelib tushgani haqida xabarlar kelgan. U buni “mutlaqo nomaqbul” vaziyat deb baholadi.

Eronning Sharqiy Ozarbayjon viloyati Xodafarin tumani gubernatori Ali Amirad jangovar raketalar hududdagi bir nechta qishloqlarga tushganini, oqibatda bitta turar joy vayron bo‘lgani va bir kishi jarohatlanganini ma’lum qildi.

7-oktabr kuni Eron Boku va Yerevandagi hukumatlarga norozilik notalarini yuborgan edi. Bunga Eronga bir nechta artilleriya snaryadlari va raketalar kelib tushgani sabab bo‘lgan. Shundan keyin Ozarbayjon vakillari Eron hududiga tasodifan o‘t ochgani uchun uzr so‘radi.

Shu bilan birga, avvalroq Eron mudofaa vaziri brigada generali Amir Hotamiy bunday holat qaytalansa, Tehron ogohlantirishlar bilan cheklanmasligi haqida tahdid qilgan edi.

Tog‘li Qorabog‘da keng qamrovli jangovar harakatlar 27-sentabrdan buyon davom etmoqda. Bu mintaqadagi so‘nggi o‘n yillikda kuzatilgan eng jiddiy to‘qnashuv bo‘lmoqda.