АҚШ президенти Дональд Трамп коронавирусга топширган биринчи тестининг ижобий жавоби ҳақида маълум қилмаган. Бу ҳақда The Wall Street Journal газетаси ўз манбаларига таяниб хабар қилди, деб ёзмоқда «РБК».
Трамп тест натижаси ҳақида 1 октябрь куни кечки пайт — Fox News телеканали эфирида чиқишидан олдинроқ билган. Ўшанда президент COVID-19’га топширган биринчи тести жавоби ижобий чиққани ҳақида айтмасликка қарор қилган ва бунинг ўрнига ўзининг ёрдамчиси Ҳоуп Хиксда коронавирус аниқланганини тасдиқлаган.
Бундан ташқари, Трамп тест натижасини эълон қилмасликни ўз ёрдамчиларидан биридан ҳам илтимос қилган. Коронавирусни юқтирганлиги ҳақида Трамп расман 2 октябрь куни кечаси эълон қилган.
Оқ уй ходимлари учун амал қиладиган қоидаларга кўра, экспресс-тест натижаси ижобий чиқса, улар коронавирусни аниқлаш бўйича иккинчи марта янада аниқроқ тестни топширади.
Ҳозирча Оқ уй бу мавзу юзасидан изоҳ берганича йўқ.
Аввалроқ АҚШ президенти Дональд Трамп ўз тарафдорлари билан учрашиш учун бироз вақтга шифохонани тарк этгани ҳақида хабар берилган эди.
Эслатиб ўтамиз, Дональд Трамп ва унинг рафиқаси Меланияда 2 октябрь куни коронавирусга топширган тест жавоби ижобий чиққан. Бундан аввал Трампнинг маслаҳатчиси Ҳоуп Хиксда COVID-19 аниқланган, шу сабабли президент оиласи билан биргаликда Оқ уйда изоляция қилинганди. Трампнинг касаллиги тасдиқлангандан сўнг у Уолтер Рид номидаги ҳарбий тиббиёт марказига ётқизилган.
Изоҳ (0)