Qashqadaryoda baxtsiz hodisa sabab bir qo‘lidan ayrilgan qiz kuniga 130-150 kg paxta terib, odamlarga o‘rnak bo‘lmoqda

Qashqadaryo viloyatining Chiroqchi tumanida tug‘ilgan Gulchehra Qipchoqova baxtsiz hodisa sabab bir qo‘lidan ayrilgan bo‘lsa-da, paxta dalasiga chiqib, kuniga 130-150 kg paxta terib, to‘rt muchasi sog‘ odamlarga o‘rnak bo‘lmoqda.

Bu haqda “Daryo”ga xabar bergan Mirishkor tuman hokimligi axborot xizmati rahbari Azizbek Yazdurdiyevning ma’lumot berishicha, viloyat rahbari Zoir Mirzayev Gulchehraning holidan xabar olish uchun Mirishkor tumanining paxta dalalarida bo‘lib, unga sovg‘a bergan.

“Mehnatim orqali qadr topishni xohlayman. Shukurki, ahvolim shunday bo‘lsa-da, mehnat qilyapman. Besh yildan beri Mirishkor tumaniga kelib, paxta teraman. Viloyat hokimiga rahmat, holimdan xabar olib, sovg‘a berdi”, — deydi Gulchehra Qipchoqova.

Azizbek Yazdurdiyevning qo‘shimcha qilishicha, 23 yoshga to‘lgan Gulchehra Qipchoqovaga talabalik ham nasib qilgan. U Toshkent davlat pedagogika universitetining Shahrisabz filiali talabasi bo‘lgan.

“Test sinovlarining javobi chiqqach, natijani ko‘rsam, ‘budjet’ga o‘qishga kiribman”, — deydi chiroqchilik qiz.