Namangan shahrining Guliston dahasida qurilishi rejalashtirilgan Namangan City loyihasi bekor qilinadi. Bu haqda viloyat hokimi Shavkatjon Abdurazzaqov mahalliy aholi vakillari bilan uchrashuvi davomida ma’lum qildi, deya xabar beradi “Daryo” muxbiri Azizbek Abduvaliyev.

Foto: Namangan viloyati hokimligi axborot xizmati

“Uylarning buzilishi aholi uchun tashvish va qiyinchiliklar tug‘dirishi bor gap. Namangan shahriga qo‘shni tumanlar hisobidan 3800 gektar yer maydoni qo‘shib berildi. Biz yangi qurilishlarni shu hududlarda olib boramiz. Yangi yerlarda qursak, tezroq bitadi, odamlar ham ovora bo‘lmaydi.

Guliston dahasida ko‘chalarni asfalt qilamiz, yoritamiz, suv tortamiz. Bundan fuqarolarimiz ham chetda turmasligi kerak. Yillar mobaynida suvoq-bo‘yoq tegmagan xonadonlar bor. Shaharning qoq markazidagi hududga bunday holat yarashmaydi”, — dedi Shavkatjon Abdurazzaqov.

Foto: Namangan viloyati hokimligi axborot xizmati

Yig‘ilganlar viloyat rahbarining mazkur qarorini olqishlar bilan kutib oldi. Guliston dahasining obod va ko‘rkamligi, jinoyatchilikdan xoli hududga aylanishida hissalarini qo‘shishlarini bildirdi.

Eslatib o‘tamiz, Namanganda ham Siti qurilishi 2018-yil may oyida ma’lum bo‘lgandi.

Kadr: “O‘zbekiston 24”

Namangan City loyihasi Namangan shahri markazida 78 gektar maydonda barpo etilishi, bu yerdan biznes-markaz, zamonaviy savdo majmualari, 3, 4 va 5 yulduzli mehmonxonalar, ofislar, anjumanlar saroyi, ko‘rgazma zallari, turar joy va villalar, restoranlar, maktab, bolalar bog‘chasi va boshqa ijtimoiy soha obyektlari o‘rin olishi ko‘zda tutilgandi.

Foto: Namangan viloyati hokimligi axborot xizmati

Ma’lumot uchun, Shavkatjon Abdurazzaqov bugun Namangan shahridagi o‘rganishlari davomida yana bir gavjum manzil—Marg‘ilon ko‘chasidagi uylarning buzilishi ham to‘xtatilishini e’lon qildi.

Foto: Namangan viloyati hokimligi axborot xizmati