Farg‘ona viloyatida koronavirusga chalingan o‘g‘lini uyda, yashirincha davolashga harakat qilgan tibbiyot xodimining o‘zi ham virus yuqtirib olgan va hamkasblariga ham yuqtirgan. Bu haqda viloyat sog‘liqni saqlash boshqarmasi boshlig‘i Odiljon Umarovning aholiga qilgan murojaatida ma’lum qilindi, deya xabar berdi “Daryo” muxbiri.
Odiljon Umarov
Foto: Videodan kadr
Qayd etilishicha, amalga oshirilayotgan targ‘ibot ishlariga qaramasdan, ayrimlar karantin qoidalariga amal qilmayapti. Natijada virus yuqtirib olish holatlari kundan kunga ko‘payib bormoqda.
“O‘zbekiston tumanida belgilangan tartiblarga qat’iy rioya qilinmayotgani uchun ham kasallik qayd qilinyapti. Toshkent shahridan kelgan fuqaroda kasallik alomatlari bo‘lishiga qaramasdan shifokorlardan maslahat olmay, uyida yashirincha davolangan. Quva tumanida esa tibbiyot xodimi o‘g‘lida klinik belgilar paydo bo‘lishiga qaramasdan uni uyda davolashga harakat qilgan. Oqibatda o‘zi ham virus yuqtirib olib, koronavirus infeksiyasi tarqalishiga to‘g‘ridan to‘g‘ri sababchi bo‘lgan. Ish joyidagi xodimlariga ham virus yuqtirganligi raqamlarda aniq qayd etilgan. Bu holat barchamizga saboq bo‘lishi kerak”, — dedi viloyat sog‘liqni saqlash boshqarmasi boshlig‘i Odiljon Umarov.
Ta’kidlanishicha, holat koronavirusga qarshi kurashish uchun tashkil etilgan viloyat shtabi tomonidan nazoratga olingan. Epidemiologik surishtiruvlar natijasida gumonlanuvchilardan to‘liq test tahlillari olinib, davolash ishlari boshlab yuborilgan.
“Bugungi kunda Farg‘ona shahrida ham epidemiologik vaziyat barqaror, deb aytishga biroz o‘ylanib qolamiz. Nima uchun? Chunki ayrim kishilar boshqa hududlardan virusni bu yerga olib kelib, uning tashuvchisi bo‘lib qolmoqda”, — dedi Odiljon Umarov.
Eslatib o‘tamiz, Qashqadaryoda ham shifokor oilaviy tadbir va deputatlar bilan uchrashuvda 30 kishiga koronavirus yuqtirgani ma’lum bo‘lgandi.
