Фарғона вилоятида коронавирусга чалинган ўғлини уйда, яширинча даволашга ҳаракат қилган тиббиёт ходимининг ўзи ҳам вирус юқтириб олган ва ҳамкасбларига ҳам юқтирган. Бу ҳақда вилоят соғлиқни сақлаш бошқармаси бошлиғи Одилжон Умаровнинг аҳолига қилган мурожаатида маълум қилинди, дея хабар берди «Дарё» мухбири.
Қайд этилишича, амалга оширилаётган тарғибот ишларига қарамасдан, айримлар карантин қоидаларига амал қилмаяпти. Натижада вирус юқтириб олиш ҳолатлари кундан кунга кўпайиб бормоқда.
«Ўзбекистон туманида белгиланган тартибларга қатъий риоя қилинмаётгани учун ҳам касаллик қайд қилиняпти. Тошкент шаҳридан келган фуқарода касаллик аломатлари бўлишига қарамасдан шифокорлардан маслаҳат олмай, уйида яширинча даволанган. Қува туманида эса тиббиёт ходими ўғлида клиник белгилар пайдо бўлишига қарамасдан уни уйда даволашга ҳаракат қилган. Оқибатда ўзи ҳам вирус юқтириб олиб, коронавирус инфекцияси тарқалишига тўғридан-тўғри сабабчи бўлган. Иш жойидаги ходимларига ҳам вирус юқтирганлиги рақамларда аниқ қайд этилган. Бу ҳолат барчамизга сабоқ бўлиши керак», — деди вилоят соғлиқни сақлаш бошқармаси бошлиғи Одилжон Умаров.
Таъкидланишича, ҳолат коронавирусга қарши курашиш учун ташкил этилган вилоят штаби томонидан назоратга олинган. Эпидемиологик суриштирувлар натижасида гумонланувчилардан тўлиқ тест таҳлиллари олиниб, даволаш ишлари бошлаб юборилган.
«Бугунги кунда Фарғона шаҳрида ҳам эпидемиологик вазият барқарор, деб айтишга бироз ўйланиб қоламиз. Нима учун? Чунки айрим кишилар бошқа ҳудудлардан вирусни бу ерга олиб келиб, унинг ташувчиси бўлиб қолмоқда», — деди Одилжон Умаров.
Эслатиб ўтамиз, Қашқадарёда ҳам шифокор оилавий тадбир ва депутатлар билан учрашувда 30 кишига коронавирус юқтиргани маълум бўлганди.
Изоҳ (0)