Mundial, “Oltin to‘p”, “Real”, Zidan, Ronaldu, Ramos va Neymar haqida. Karim Benzema muxlislar savollariga javob berdi

“Real” hujumchisi Karim Benzema o‘zining YouTube kanalida muxlislarning bir qancha savollariga javob berdi.

— Siz bilan birga o‘ynagan eng yaxshi futbolchi kim?

— Bunga javob berish qiyin. Krishtianu, Kaka, Raul bilan birga o‘ynaganman, hozir esa Ramos. Aniq bittasini tanlay olmayman.

Karim Benzemaning “El-Klasiko”lardagi top-5 golini tomosha qiling (video)

— Maydondagi pozitsiyangiz qanday.

— Hech qachon o‘zim uchun aniq bir pozitsiya belgilashga harakat qilmayman. Men futbolchiman va dunyoning eng yaxshi o‘yinchisi bo‘lishga harakat qilaman.

— “Oltin to‘p”ni qo‘lga kiritish haqida o‘ylaysizmi?

— Albatta, bolaligimdan beri. Biroq bu — meni har kuni aqldan ozdiradigan narsa emas.

— Nimadan ko‘proq afsuslanasiz va nimadan g‘ururlanasiz?

— Hech narsadan afsuslanmayman. “Real”dagi g‘alabalarim bilan esa faxrlanaman.

— Siz yoqtirgan o‘n bir nafar o‘yinchi?

— “Real” tarkibi.

— Siz uchun dunyoning keyingi uch nafar eng yaxshi o‘yinchilari kim?

— Bilmadim, chunki futbol juda tez rivojlanmoqda. Siz butun mavsum davomida yaxshi bo‘lishingiz va jamoangiz bilan unvonlarni yutishingiz kerak. Bitta o‘yinda uchta gol urish sizni dunyo yulduziga aylantirmaydi.

— Chempionlar Ligasining to‘rtta sovrinini Jahon Chempionatining  bitta kubogiga almashasizmi?

— Yo‘q, hech qachon.

— Siz duch kelgan eng yaxshi himoyachi?

— Ramos va Varan, men har bir mashg‘ulotda ularga qarshi o‘ynayman.

— Kim bilan o‘ynashni xohlagan bo‘lardingiz?

— Bu oson. Ronaldo va Zidan.

— Sizningcha, dunyoning eng yaxshi 5 nafar driblingchisi kim?

— Neymar. Ro‘yxat tugadi.

Ma’lumot uchun, Karim Benzema 2009-yildan beri “Real” sharafini himoya qilib keladi. Bungacha u “Lion” safida to‘p surgan. 32 yoshli fransiyalik futbolchi “qirollik klubi” bilan shu vaqtgacha 19 sovrin, xususan 3 marta Ispaniya chempionligini va 4 marta Chempionlar Ligasi bosh sovrinini qo‘lga kiritgan.

 Mavzuga doir: