World Crypto Capital компанияси раҳбари Алексей Менг Ўзбекистонда 2 мингдан ортиқ фуқаронинг жами 1,7 миллион долларини қўлга киритиб, мамлакатдан чиқиб кетган. Бу ҳақда ҳуқуқни муҳофаза қилувчи идораларга таяниб, UzNews хабар берди.
Маълум қилинишича, 29 ёшли Ўзбекистон фуқароси Алексей Менг World Crypto Capital МЧЖга раҳбарлик қилган ва www.icgexpert.com интернет портали орқали фирибгарлик схемаси асосида фуқаролардан пул маблағлари жалб қилиш билан шуғулланган. Унга нисбатан халқаро қидирув эълон қилинган.
Мазкур портал орқали фирибгарлик йўли билан 2 мингдан ортиқ ўзбекистонликдан 1,7 миллион доллар жалб қилинган.
Жалб қилинган пул маблағларини ўзлаштириш учун Алексей Менг ва унинг шериклари 2019 йилнинг декабрь ойида компания фаолиятини тўхтатган ва Ўзбекистондан чиқиб кетган.
Компания ёпилганидан кейин Алексей Менг Москвада таътилда эканлигини айтиб, мижозларни ишонтиришда давом этган. Бироз вақтдан кейин электрон платформанинг ўзи ҳам ғойиб бўлган. Ўша пайтда компания томонидан берилган шартномаси бўлган кишилар мазкур шартномалар 100 минг сўмлик консалтинг хизмати учун тузилганини аниқлашган.
Компания 2018 йил охирида ўз хизматларини оммабоп ОАВларида фаол реклама қилишни бошлаган. У ўзини Ўзбекистонда рақамли иқтисодиётнинг ривожланишига, блокчейн ҳақида маълумотларнинг мавжудлиги ва аҳолининг даромадларини оширишга кўмаклашувчи ташкилот сифатида кўрсатган. Кейинчалик компания интернет, шунингдек, унинг хизматларидан фойдаланганлар орқали машҳур бўлишни бошлаган.
Компания лойиҳасига пул тикувчилар билан тўғридан-тўғри маслаҳатлашишда компания ходимлари уларга қонуний тўлов воситаси бўлган криптовалюта сотиб олишларини тушунтирган. Шу билан бирга, ҳар бир омонатчида электрон ресурсда шахсий кабинет мавжуд бўлиб, унда омонат миқдорини ҳам, маблағларнинг келиб тушишини ҳам кузатиш мумкин эди. Айрим эҳтиёткор фуқаролар томонидан ўтказиб бериладиган сумма нега шартномада кўрсатилмаганлиги ҳақида сўралганда, ходимлар барча суммалар фойдаланувчининг шахсий кабинетида кўрсатилишига ишонтирган.
Компаниянинг менежерлари ва маслаҳатчилари қурбонига айланган фуқароларнинг сўзларига кўра, дастлабки тўлов 1000 доллар бўлган, бир ҳафта ичида 500 доллар мижозларга қайтарилган. Омонатлардан дивидендлар олинганлиги сабабли компания бошланғич маблағлар миқдорини оширишни талаб қилган.
Бугунги кунга келиб, Ўзбекистонда содир этилган молиявий фирибгарликлар сабабли жиноий жавобгарликдан қочиш учун Алексей Менг Facebook ижтимоий тармоғида Alex Меng профили орқали мамлакатда амалга оширилаётган ислоҳотлар тўғрисида провокацион кампания ўтказмоқда.
Алексей Менг ва унинг шерикларига нисбатан Ўзбекистоннинг ваколатли органлари Жиноят кодексининг 168-моддаси 4-қисмининг «а», «в» бандлари (Уюшган гуруҳ томонидан ёки унинг манфаатларини кўзлаб жуда кўп миқдорда содир этилган фирибгарлик), 188-1-моддаси 3-қисмининг «а» ва «в» бандлари (Уюшган гуруҳ томонидан ёки унинг манфаатларини кўзлаб жуда кўп миқдорда пул маблағларини ва (ёки) бошқа мол-мулкни жалб этишга доир ноқонуний фаолият) ва 190-модда 2-қисмининг «а», «в» бандлари (Бир гуруҳ шахслар томонидан олдиндан тил бириктириб жуда кўп миқёсда лицензиясиз фаолият юритиш) билан жиноят иши қўзғатилган.
Изоҳ (0)