Rossiyada faoliyat olib borayotgan 45 nafar qirg‘izistonlik tibbiyot xodimi mahalliy hamkasblariga yordam berish uchun Qirg‘izistonga olib kelindi. Bu haqda “24.kg” respublika shtabiga asoslanib xabar bergan.
Shifokorlar va kichik tibbiyot personali Qirg‘izistonning “qizil” va “toza” hududlaridagi klinikalarda bir oy davomida faoliyat olib boradi. Parvozlar, yashash sharoiti va volontyorlarning ovqatlanishi uchun zaruriy ehtiyojlar homiylik mablag‘lari hisobidan qoplanadi. Tibbiyot xodimlari bilan birga hisoblaganda “Aeroflot” kompaniyasining reysida jami 426 nafar Qirg‘iziston fuqarosi (talabalar, keksa yoshli bemorlar, yosh bolali va homilador ayollar) ham respublikaga olib kelingan.
5-iyulda Qirg‘izistonga 26 nafar qirg‘iz shifokor volontyorlari guruhi yetib kelgan. Ayni vaqtda ular respublikaning “qizil” hududlaridagi kasalxonalarda faoliyat yuritmoqda. Ularning parvoz xarajatlari ham metsenatlar tomonidan Qirg‘izistonning Rossiyadagi elchixonasi ko‘magida qoplab berilgan.
Qirg‘iziston klinikalarida koronavirus epidemiyasiga qarshi kurashda tibbiyot xodimlari yetishmayapti. Avval mamlakat bosh vaziri Qubatbek Bo‘ronov sog‘liqni saqlash tizimidagi barcha tibbiyot xodimlarini mehnat ta’tilidan chaqirib olish bo‘yicha ko‘rsatma bergan. Hukumat rahbari barcha shifokor va hamshiralarni o‘z hamkasblariga yordam berishga chaqirgan. Mamlakat sog‘liqni saqlash vaziri Madamin Karatayev Bishkekning o‘zida mehnat qilayotgan tibbiyot xodimlarining 30 foizi COVID-19 bilan kasallanganini ma’lum qilgan. Keyinchalik vazirning o‘zi pnevmoniyaga chalingani, uning o‘rinbosari koronavirus infeksiyasini yuqtirib olgani xabar qilindi.
Qirg‘izistonda 2020-yil 13-iyul holatiga ko‘ra, 11 117 kishida koronavirus infeksiyasi aniqlangan. Epidemiya davrida 3460 nafar bemor kasallikdan tuzalgan, 147 kishi COVID-19 asoratlari oqibatida vafot etgan. Shuningdek, mamlakatda koronavirusga topshirgan testi manfiy deb topilgan 452 kishi pnevmoniya tufayli hayotdan ko‘z yumgan.
Izoh (0)