O‘zbekistonda koronavirusga qarshi kurash shtabi a’zosi, tibbiyot fanlari doktori, professor Anvar Alimov mamlakatda koronavirusga chalinganlar soni qanchaga yetsa, sog‘liqni saqlash tizimi inqiroz holatiga tushib qolishi, mamlakat imkoniyatlari qancha kasalga xizmat ko‘rsatishga yetishi masalasidagi savolga javob berdi.
AOKAda 13-iyul, dushanba kuni bo‘lib o‘tgan brifingda professorga “O‘zbekistonda koronavirusga chalinganlar soni qanchaga yetsa, sog‘liqni saqlash tizimi inqiroz holatiga tushib qoladi? Imkoniyatlarimiz qancha kasallarga xizmat ko‘rsatishga yetadi?”, degan savol berildi.
Tibbiyot fanlari doktori mazkur savolga aniq javob bermadi hamda koronavirusga qarshi kurashayotgan boshqa davlatlarning tajribasini misol sifatida keltirib, davlat tomonidan amalga oshirilayotgan barcha chora-tadbirlar mutaxassislar bergan takliflarga asoslanishini ta’kidladi.
“Bu borada dunyo hamjamiyatidagi statistik ma’lumotlarga e’tibor qaratish kerak. Janubiy Koreyani olamizmi, Xitoyni olamizmi, bugungi kunda koronavirusga qarshi kurashayotgan davlatlarning tajribasini o‘rganganimizda, davlat tomonidan amalga oshirilayotgan barcha chora-tadbirlar mutaxassislar bergan takliflarga asoslangan. Xususan, bizda ham shunday. Taklif-tavsiyalarni davlat komissiyasi har tomonlama o‘rganadi. Barcha ishlarimiz komissiya tomonidan qabul qilingan protokollar ijrosi doirasida amalga oshirilmoqda. Hozir biz bir necha asosiy yo‘nalishlarda olib borayotgan ishlarimiz keyingi bosqichdagi holatlarning oldini olishga qaratilgan”, — deya javob berdi Anvar Alimov.
Avvalroq Respublika maxsus komissiyasi 10-iyul holatiga ko‘ra, O‘zbekistonning mavjud sog‘liqni saqlash muassasalari quvvati koronavirusga chalingan yangi bemorlarni qabul qilish uchun yetarli emasligi, “tizimni qayta tiklash” uchun 1-avgustgacha kuchaytirilgan karantin tartibi qaytadan joriy etilganini ma’lum qilgan edi. O‘sha vaqtda koronavirusdan davolanayotgan bemorlar soni rasman 3986 nafar edi.
Sog‘liqni saqlash vaziri Alisher Shodmonovning fikricha, O‘zbekistonda koronavirus hali eng yuqori cho‘qqisiga chiqmagan, O‘zbekistonda koronavirus avj olsa, tibbiyot og‘ir vaziyatga tushib qolishi mumkin.
Professor Habibulla Oqilovning ta’kidlashicha, agar O‘zbekistonda kuniga 1-1,5 mingta kasallanish holati aniqlansa, sog‘liqni saqlash tizimi qo‘shni mamlakatlarniki kabi qulaydi.
E’tiborga molik tomoni, professor Oqilov 8-iyul kuni qilgan chiqishida O‘zbekiston sog‘liqni saqlash tizimidagi resurslar “poyoniga yetgani”, bo‘sh koyka-o‘rinlar qolmaganini ma’lum qilgan edi. 9-iyuldagi brifingda esa Oqilov koyka-o‘rinlar, dori zaxirasi mavjudligini, tizim har qancha bemorni qabul qila olishini ta’kidladi.
Shuningdek, Iqtisodiy tadqiqotlar va islohotlar markazi direktori Obid Hakimov O‘zbekistonda karantin hozir kuchaytirilmasa, dekabrgacha koronavirusga chalinganlar soni 64 mingga yetishi mumkinligini ma’lum qildi. Uning so‘zlariga ko‘ra, Toshkent shahridagi 16 ta tibbiyot muassasasida jami 3580 ta koyka-o‘rin koronavirus infeksiyasini yuqtirib olgan bemorlar uchun ajratilgan, biroq 13-iyul soat 17:00 holatiga ko‘ra, O‘zbekistonda 5446 nafar bemor koronavirusdan davolanmoqda, ularning 4450 nafari Toshkentda ro‘yxatga olingan.
Izoh (0)