Haftalik dayjest: Karantinning kuchayishi, o‘zimizning Volkswagen Caddy, Behbudiy stipendiyasi
Ancha salqin ob-havoli hafta ham yakuniga yetmoqda. Biz hafta yangiliklarini o‘quvchilar uchun saraladik. Dayjestni boshlaymiz.
Ma’lumki, Rossiya Federatsiyasi 9-may kuni o‘tkazishi rejalashtirilgan harbiy parad koronavirus pandemiyasi sababli 24-iyunga surilgan edi. 1945-yilda ham g‘alabaning birinchi markaziy paradi 24-iyunda o‘tkazilgan. Ushbu tadbirda O‘zbekiston prezidenti Shavkat Mirziyoyev ham ishtirok etdi. Ta’kidlanishicha, bo‘lib o‘tgan paradda 13 ta davlatdan 225 ta harbiy texnika, 14 ming askar va ofitser qatnashdi.
Rossiya poytaxti osmonidan 55 samolyot va 20 ta vertolyot uchib o‘tdi. Moskvadagi G‘alaba paradida Shavkat Mirziyoyevdan tashqari boshqa davlat rahbarlari ham mehmon bo‘ldi. Ular orasida Belarus prezidenti Aleksandr Lukashenko, Qozog‘iston prezidenti Qosim-Jo‘mart To‘qayev, Qirg‘iziston prezidenti So‘ronbay Jeenbekov, Moldova prezidenti Igor Dodon, Tojikiston prezidenti Emomali Rahmon ham bor edi.
Shavkat Mirziyoyev tashrif mobaynida Moskva shahridagi “Noma’lum askar” yodgorligiga gul qo‘ydi. Moskvadagi Islom Karimov nomi bilan ataluvchi xiyobonga borib, u yerdagi o‘zbekistonliklar bilan salomlashdi va ustozi Islom Karimov poyiga gulchambar qo‘ydi.
* * *
O‘zbekistonda koronavirusdan vafot etganlar sonini 20 nafar deb bermoqchi edik. Biroq bugun koronavirusga chalingan shifokor dunyodan o‘tishi bilan o‘limlar soni 21 taga yetdi. So‘nggi kunlarda infeksiya yuqtirganlar soni o‘sa boshlashi bilan hukumat karantin choralarini kuchaytirishga kirishdi. Poytaxtda blokpostlar qayta tiklanadi. Mavjud ahvol yomonlashayotganini hisobga olib, Respublika maxsus komissiyasining qaroriga binoan, Toshkent shahrida koronavirus infeksiyasi aniqlangan “qizil” hududlarni blokpostlar o‘rnatgan holda mahalla, dahalar va ko‘chalar kesimida yopilishi, karantinga olingan fuqarolarning uyi oldida 24 soatlik navbatchilik tashkil etilishi belgilandi, deb yozmoqda @davletovuz Telegram kanali.
Yana bir yangilik shuki, chet eldan qaytganlar karantin nazoratini mehmonxonalarda o‘tkazishi mumkin. Koronavirus infeksiyasi bilan kasallanish holatlari kamaymagan davlatlardan O‘zbekistonga kirib kelayotgan fuqarolar o‘z xohishiga ko‘ra 14 kunlik karantin muddatini davlat tomonidan bepul ta’minlanadigan karantin markazlarida yoxud haqini to‘lagan holda mehmonxonada o‘tkazishi mumkin bo‘ladi.
27-iyun kuni 255 kishida koronavirus aniqlandi. Beshta hududda aholi orasida kasallik qayd etildi. 27-iyun kuni koronavirusdan kunlik tuzalishlar soni bo‘yicha ham rekord o‘rnatildi – 202 kishi uyiga kuzatildi. 2020-yil 28-iyun soat 17:00 holatiga ko‘ra, O‘zbekistonda koronavirus infeksiyasi qayd etilganlar soni 7 813 nafarni tashkil etmoqda.
* * *
O‘zbek avtomobil bozoriga nemis va chex mashinalari kirib kelmoqda. Bu borada prezident qarori qabul qilindi. Qarorga ko‘ra, birinchi bosqichda 2020-yildan tayyor Volkswagen va Skoda’lar sotiladi. Ikkinchi bosqichda 2022-yildan Jizzaxda avtomobil ishlab chiqishga o‘tiladi. Qolaversa, mamlakatimizda Yevro-5 standartiga javob beradigan 40 dan ortiq avtomobillarga yonilg‘i quyish shoxobchalari quriladi.
Xo‘sh, Volkswagen Caddy o‘zi qanaqa avtomobil? Yetti va besh o‘rindiqli bo‘lgan ushbu yo‘lovchi va yuk miniveni ham biznes yuritishga, ham oilaviy foydalanish uchun to‘g‘ri keladi. Tejamkor va texnologik (MPI) dvigatel 1,6 litr quvvatga ega, benzinda ishlaydi. Yoqilg‘i sarfi – shaharda 100 kilometrga 9,3 litr, trassada 100 kilometrga 6,1 litr.
Bu yangilik “O‘zavtosanoat” monopoliyasidan xalos bo‘lish umidini uyg‘otmoqda. Albatta, ushbu zavodning ham taqdiri Peugeot-Citroen’niki kabi bo‘lmasa.
* * *
O‘zbekistonda biofizika faniga asos solgan akademik Bekjon Toshmuhamedov bu hafta 85 yoshida dunyodan o‘tdi. Bekjon Toshmuhammedov 1935-yil 27-yanvarda Toshkentda yozuvchi Oybek xonadonida tug‘ilgan. 1958-yilda Moskva davlat universitetini tamomlagan. Toshkent davlat universitetida kichik ilmiy xodim, biokimyo va biofizika kafedrasi dotsenti, O‘zbekiston FA yadro fizikasi va biokimyo instituti biofizika laboratoriyasi mudiri bo‘lib ishlagan. Oliy attestatsiya komissiyasi raisi, O‘zbekiston FA Prezidiumi a’zosi bo‘lgan.
Bek Oybekovich AQSh, Angliya, Germaniya, Fransiya, Shvetsiya, Daniya kabi mamlakatlarning bir necha xalqaro ilmiy markaz va akademiyalarining faxriy a’zosi edi. Shuningdek, u 90-yillarda siyosat bilan ham shug‘ullangan. Shavkat Mirziyoyev akademik Bekjon Toshmuhamedovning vafoti munosabati bilan uning oila a’zolariga ta’ziya bildirdi.
* * *
27-iyun – Matbuot va ommaviy axborot vositalari xodimlari kuni. Odatda, bu kuni jurnalistlarni yig‘ib tadbir o‘tkazilishi an’anaga aylangan. “Daryo” o‘zbek jurnalistlarining ish jarayonidagi rasmlarini to‘plab chop etdi. Shavkat Mirziyoyev matbuot va OAV xodimlarini kasb bayrami bilan tabrikladi hamda O‘zbekiston jurnalistika va ommaviy kommunikatsiyalar universiteti talabalari uchun Mahmudxo‘ja Behbudiy nomidagi stipendiyani ta’sis etishni taklif qildi.
Prezident nutqida ayrim jurnalist va blogerlarimizda bilim va professional malaka, bahs madaniyati yetishmasligi haqida ham to‘xtaldi hamda “Biz bo‘lg‘usi jurnalistlarimiz chuqur bilim va kasb mahoratini, ona tilimiz bilan birga chet tillarni, faol fuqarolik pozitsiyasini, axborot-kommunikatsiya texnologiyalari, notiqlik malakasini puxta egallashlariga alohida e’tibor qaratishimiz zarur”, dedi.
“Daryo”da qoling va eng so‘nggi yangiliklardan xabardor bo‘ling. Karantin kuchaymoqda, zaruriy gigiyena talablariga rioya qiling.
