Toshkentdagi Epidemiologiya, mikrobiologiya va yuqumli kasalliklar ilmiy-tekshirish instituti klinikasida 21 nafar, Virusologiya ilmiy-tekshirish instituti klinikasida 11 nafar, 3-sonli tug‘ruq majmuasida 3 nafar, jami 35 nafar bemor sog‘ayib, 16-iyun kuni o‘z uylariga kuzatildi, deb xabar bermoqda SSV matbuot xizmati.
Epidemiologiya, mikrobiologiya va yuqumli kasalliklar ilmiy-tekshirish instituti klinikasida tuzalganlarning 16 nafari erkaklar, 5 nafari ayollar bo‘lib, yoshi kattasi 61 yoshda, kichigi esa 9 yoshda. Hududlar kesimida olinsa, Toshkent shahrida 6 nafar, Toshkent viloyatida 4 nafar, Namangan viloyatida 3 nafar, Qashqadaryo, Farg‘ona va Samarqand viloyatlarida 2 nafardan, Sirdaryo va Surxondaryo viloyatlarida 1 nafardan bemor tuzalgan.
Virusologiya ilmiy-tekshirish instituti klinikasida tuzalganlarning 9 nafari erkaklar, 2 nafari ayollar bo‘lib, yoshi kattasi 63 yoshda, kichigi esa 10 yoshda. Hududlar kesimida olinsa, Toshkent shahrida 3 nafar, Qoraqalpog‘iston Respublikasi, Farg‘ona va Toshkent viloyatlarida 2 nafardan, Qashqadaryo va Samarqand viloyatlarida 1 nafardan bemor tuzalgan.
3-sonli tug‘ruq majmuasida shifo topganlarning biri 24 yoshli surxondaryolik homilador Sankt-Peterburgdan, 21 yoshli asli qashqadaryolik bo‘lgan ikkinchi fuqaro esa Moskvadan kelib, karantin muassasasida kasalligi aniqlangan. Uchinchi fuqaro esa 41 yoshli poytaxtlik homilador koronavirusga chalinganlar bilan muloqot orqali ushbu infeksiyani yuqtirib olgan.
Shunday qilib, endilikda Toshkent shahri va viloyatida 3054 holatda kasallik qayd etilishi barobarida 1989 nafar bemor sog‘aydi.
Bundan avval O‘zbekistonda koronavirusdan sog‘ayganlar soni 4019 nafarni tashkil etayotgandi. Endilikda ular soni 4054 nafarga yetdi.
Ma’lumot uchun, 16-iyun soat 17:00 holatiga ko‘ra, koronavirusga chalinganlar soni 5328 nafarga yetdi, bemorlarning 19 nafari kasallik asoratlari oqibatida vafot etgan.
