Futbol bo‘yicha O‘zbekiston Superligasi 4-turdan o‘rin olgan markaziy uchrashuvda Qarshining “Nasaf” klubi Namanganning “Navbahor”ini qabul qildi.

Foto: “Nasaf”

Har ikkala jamoaning ehtiyotkor o‘yini bilan boshlangan uchrashuv kutilmaganda shiddatli tus oldi: 5-daqiqada “Navbahor” futbolchisi Mirzohid G‘ofurov jarima maydonchasi tashqarisidan qarshiliklar darvozasini ishg‘ol etdi – 0:1. Shundan so‘ng bellashuvni boshqarib borayotgan Sherzod Qosimov jarima maydonchasida qo‘l bilan harakat uchun “Navbahor” darvozasi tomon penalti belgiladi, biroq Umar Eshmurodov uni golga aylantira olmadi. 2 daqiqa o‘tib esa Qosimov endi namanganliklar foydasiga 11 metrlik nuqtani ko‘rsatdi. Zarba bu safar ham golga aylanmadi — Turg‘unboyevning zarbasini Muhammadjonov bartaraf etdi. Keyingi yarim soatlik birmuncha sokin o‘tdi va tanaffusgacha hisob o‘zgarishsiz qoldi.

Ikkinchi bo‘lim “Nasaf”ning tezkor hujumlari bilan boshlandi va 66-daqiqaga kelib Bobur Abduxoliqov o‘zining Superligadagi 4-golini urdi – 1:1. Biroq uch daqiqa o‘tgach, mehmonlar safida Zabihullo O‘rinboyev Mashhurjon Muhammadjonov bilan yakkama-yakka vaziyatga chiqib, to‘pni uning ustidan oshirib darvozaga joylab qo‘ydi. O‘yinning asosiy vaqti tugashiga 3 daqiqa qolganda esa qarshiliklar Marko Stanoyevichning goli evaziga hisobni tenglashtirdi. Shu tariqa gollarga boy bo‘lgan uchrashuvda tomonlar murosa yo‘lini tanladi.

Mazkur natijadan keyin “Nasaf” ochkolari sonini 10 taga yetkazib olib, musobaqa jadvalida birinchi o‘ringa ko‘tarilib oldi. “Navbahor” esa 5 ochko jamg‘argan holda 7-pog‘onaga ko‘tarildi.

Superliga

4-tur bahsi

14-iyun, yakshanba

“Nasaf” — “Navbahor” 2:2

Gollar: 0:1 – 5 G‘ofurov, 1:1 – 66 Abduholiqov, 1:2 – 69 O‘rinboyev, 2:2 – 87 Stanoyevich

“Nasaf”: Mashxurjon Muhammadjonov, Husniddin Aliqulov, G‘olib G‘aybullayev (Xaris Dilaver, 79), Bobur Abduxoliqov, Sharof Muhitdinov, Jo‘rabek Mannonov (Murodbek Xo‘jamberdiyev, 73), Islom Kenjaboyev (Sherzod Nasrullayev, 46), Akmal Mozgovoy (Dilshod Rahmatullayev, 73), Oybek Bozorov (Husayn Norchayev, 84), Marko Stanoyevich, Umarbek Eshmurodov.

“Navbahor”: O‘tkir Yusupov, Azimjon Ahmedov, Ivan Solovyov, Azizbek Turg‘unboyev (Zabihullo O‘rinboyev, 46), Islombek Isoqjonov (Аmirbek Jo‘raboyev, 76), Obid Jo‘raboyev, Mirzohid G‘ofurov, Igor Golban, Islom Rashidxonov, Xurshidbek Muxtorov, Abbosjon G‘ulomov (Abdulhay Ismoilov, 90+1).

Ogohlantirishlar: Turg‘unboyev (28), G‘ulomov (61),

Amalga oshirilmagan penaltilar: Eshmurodov (8), Turg‘unboyev (10).

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!