Katta futbol Italiyaga ham qaytmoqda, mamlakat kuchli beshlik ligalari orasida uchinchi bo‘lib futbol mavsumiga restart berdi. Tanaffusdan keyingi dastlabki o‘yin “Yuventus” va “Milan” jamoalari o‘rtasida kechadi.
Mazkur qarama-qarshilik A Seriya doirasida kechganda, intriga u qadar yuqori bo‘lmasligi mumkin edi. Sababi chempionatda “Yuventus” va “Milan”ning orasida yer bilan osmoncha farq bor. Kubok esa — bu boshqa masala. Unga final yo‘llanmasi tikilgan va hamma narsa bo‘lishi mumkin.
Dastlabki o‘yindagi durang natija, shubhasiz, “Yuventus”ni favoritga aylantiradi. Biroq turinliklar ushbu natijaga qanday bahslar bilan erishgani, ko‘pchilikni yodida bo‘lmasa kerak. Ikkinchi bo‘limga qo‘shib berilgan vaqtda uchrashuv hakami milanliklar darvozasi tomon bahsli penalti belgilaydi: Kalabriya to‘pga orqa o‘girib turgan va o‘rtadagi masofa ham juda qisqa edi.
Ikkala jamoa hozirda qanday formada ekani noma’lum. Rasmiy manbalar jamoalarning kurashga shayligi va ideal formada ekanini ta’kidlamoqda. Qayd etish kerak, pandemiya davrida “Yuvenus”dan Daniele Rugani, Blez Matyuidi va Paulo Dibala koronavirus bilan kurashgan bo‘lsa, “Milan”da Daniel Maldini o‘z otasi bilan birgalikda ushbu virus bilan olishdi. Norasmiy ma’lumotlarga ko‘ra, A Seriyaning sanoqli klublarigina kasallanganlar haqida ochiq ma’lumotni taqdim etgan, ular orasida esa “Yuve” va “Milan” yo‘q.
Reglamentga keladigan bo‘lsak, o‘yin tabiiyki tomoshabinlarsiz o‘tadi va asosiy vaqtda 1:1 hisob qayd etilsa, jamoalar qo‘shimcha bo‘limlar o‘ynamaydi, birdaniga penaltilar seriyasi belgilanadi.
Yo‘qotishlar
Ayni damda Turin klubi Gonsalo Iguain xizmatidan foydalana olmaydi, argentinalik futbolchi karantin vaqtida katta miqdorda vazn to‘plagani yetmagandek, mashg‘ulotlar jarayonida jarohat oldi. Shuningdek, pandemiyadan avval jiddiy jarohat olgan Merih Demiral ham bugun o‘ynay olmaydi.“Milan”da diskvalifikatsiya sabab Teo Ernandes, Zlatan Ibragimovich (unda jarohat ham bor) va Samuel Kastilyexo maydonga tusha olmaydi.
Statistika va qiziqarli faktlar:
- Jamoalar o‘zaro 289 marta to‘qnash kelgan: unda “Yuventus” 108 marta g‘alaba qozongan, 94 g‘alaba “Milan”da va 87 marta durang qayd etilgan.
- Rasmiy o‘yinlar soni 231 tani tashkil qiladi. 91 g‘alaba “keksa sinyora”da, “iblislar” 66 marta zafar quchgan va 74 bora murosa yo‘li tanlangan.
- Italiya Kubogida “Yuventus” va “Milan” 26 ta o‘yin o‘tkazgan: g‘alabalar ko‘rsatkichi 11:7, 8 durang.
- “Yuventus” so‘nggi 7 ta uy o‘yinida “Milan”ni mag‘lub etishga erishgan.
- “Yuve” Italiya Kubogi doirasidagi uy o‘yinida “Milan”ga 1985-yildan buyon yutqazmay kelmoqda: 3 g‘alaba, 3 durang.
- Kubokdagi so‘nggi 11 o‘yinda “Yuventus” bor-yo‘g‘i bir marta mag‘lubiyatga uchragan (asosiy vaqtda).
Taxminiy tarkiblar:
“Yuventus”: Janluiji Buffon, Aleks Sandro, Leonardo Bonuchchi, Matteys de Ligt, Xuan Kuadrado, Blez Matyuidi, Rodrigo Bentankur, Sami Xedira, Krishtianu Ronaldu, Duglas Kosta, Paulo Dibala.“Milan”: Janluiji Donnarumma, Andrea Konti, Davide Kalabriya, Alessio Romanyolli, Simon Kyer, Ismael Bennaser, Jakomo Bonaventura, Frank Kessie, Hoqon Chalhono‘glu, Lukas Paketa, Ante Rebich.
Yarim final, javob bahsi
12-iyun, juma
“Yuventus” — “Milan” 00:00
Ilk uchrashuv — 1:1Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)