Катта футбол Италияга ҳам қайтмоқда, мамлакат кучли бешлик лигалари орасида учинчи бўлиб футбол мавсумига рестарт берди. Танаффусдан кейинги дастлабки ўйин «Ювентус» ва «Милан» жамоалари ўртасида кечади.
Мазкур қарама-қаршилик А Серия доирасида кечганда, интрига у қадар юқори бўлмаслиги мумкин эди. Сабаби чемпионатда «Ювентус» ва «Милан»нинг орасида ер билан осмонча фарқ бор. Кубок эса — бу бошқа масала. Унга финал йўлланмаси тикилган ва ҳамма нарса бўлиши мумкин.
Дастлабки ўйиндаги дуранг натижа, шубҳасиз, «Ювентус»ни фаворитга айлантиради. Бироқ туринликлар ушбу натижага қандай баҳслар билан эришгани, кўпчиликни ёдида бўлмаса керак. Иккинчи бўлимга қўшиб берилган вақтда учрашув ҳаками миланликлар дарвозаси томон баҳсли пенальти белгилайди: Калабрия тўпга орқа ўгириб турган ва ўртадаги масофа ҳам жуда қисқа эди.
Иккала жамоа ҳозирда қандай формада экани номаълум. Расмий манбалар жамоаларнинг курашга шайлиги ва идеал формада эканини таъкидламоқда. Қайд этиш керак, пандемия даврида «Ювенус»дан Даниэле Ругани, Блез Матюиди ва Пауло Дибала коронавирус билан курашган бўлса, «Милан»да Даниэль Мальдини ўз отаси билан биргаликда ушбу вирус билан олишди. Норасмий маълумотларга кўра, А Сериянинг саноқли клубларигина касалланганлар ҳақида очиқ маълумотни тақдим этган, улар орасида эса «Юве» ва «Милан» йўқ.
Регламентга келадиган бўлсак, ўйин табиийки томошабинларсиз ўтади ва асосий вақтда 1:1 ҳисоб қайд этилса, жамоалар қўшимча бўлимлар ўйнамайди, бирданига пенальтилар серияси белгиланади.
Йўқотишлар
Айни дамда Турин клуби Гонсало Игуаин хизматидан фойдалана олмайди, аргентиналик футболчи карантин вақтида катта миқдорда вазн тўплагани етмагандек, машғулотлар жараёнида жароҳат олди. Шунингдек, пандемиядан аввал жиддий жароҳат олган Мериҳ Демирал ҳам бугун ўйнай олмайди.«Милан»да дисквалификация сабаб Тео Эрнандес, Златан Ибрагимович (унда жароҳат ҳам бор) ва Самюэль Кастильехо майдонга туша олмайди.
Статистика ва қизиқарли фактлар:
- Жамоалар ўзаро 289 марта тўқнаш келган: унда «Ювентус» 108 марта ғалаба қозонган, 94 ғалаба «Милан»да ва 87 марта дуранг қайд этилган.
- Расмий ўйинлар сони 231 тани ташкил қилади. 91 ғалаба «кекса синьора»да, «иблислар» 66 марта зафар қучган ва 74 бора муроса йўли танланган.
- Италия Кубогида «Ювентус» ва «Милан» 26 та ўйин ўтказган: ғалабалар кўрсаткичи 11:7, 8 дуранг.
- «Ювентус» сўнгги 7 та уй ўйинида «Милан»ни мағлуб этишга эришган.
- «Юве» Италия Кубоги доирасидаги уй ўйинида «Милан»га 1985 йилдан буён ютқазмай келмоқда: 3 ғалаба, 3 дуранг.
- Кубокдаги сўнгги 11 ўйинда «Ювентус» бор-йўғи бир марта мағлубиятга учраган (асосий вақтда).
Тахминий таркиблар:
«Ювентус»: Жанлуижи Буффон, Алекс Сандро, Леонардо Бонуччи, Маттейс де Лигт, Хуан Куадрадо, Блез Матюиди, Родриго Бентанкур, Сами Хедира, Криштиану Роналду, Дуглас Коста, Пауло Дибала.«Милан»: Жанлуижи Доннарумма, Андреа Конти, Давиде Калабрия, Алессио Романёлли, Симон Кер, Исмаэл Беннасер, Жакомо Бонавентура, Франк Кессиэ, Ҳоқон Чалҳонўглу, Лукас Пакета, Анте Ребич.
Ярим финал, жавоб баҳси
12 июнь, жума
«Ювентус» — «Милан» 00:00
Илк учрашув — 1:1Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!