8-iyun kuni “Qalpoq” hamda “Sho‘rdanak” hajviy ko‘rsatuvlari ijodkorlari YHXB xodimlari haqidagi hazillari uchun ichki ishlar organlari xodimlaridan kechirim so‘ragani aks etgan videolar ichki ishlar vazirligining Telegram kanaliga joylashtirildi. Madaniyat vazirligi ushbu holatga munosabat bildirdi.
Kadr: “Sho‘rdanak” hajviy dasturi
Qayd etilishicha, vazirlik vakillari vaziyat yuzasidan “Sho‘rdanak” hajviya guruhining vakili bilan suhbatda bo‘lganida, fikr bildirishni istamagan.
“Shu bilan birga, madaniyat vazirligi hajviya, satira, askiya borasida san’atni chegaralamaslik fikrini bildirmoqda. Yillar davomida hajviya orqali jamiyatdagi muammo va illatlarni yo‘q qilishga qaratilgan, bu yo‘l orqali turli soha yo‘nalishlarini isloh qilishga ham ko‘maklashilgan. Bu xuddi jurnalist va blogerlarning bir muammoni olib chiqib, uni hal etilishiga qaratilgan mavzularga o‘xshaydi. Shunday ekan, unda nima uchun bu hazillar o‘rinli qabul qilinmaydi, degan savollar ham yo‘q emas.
Agar hajviya biron bir shaxsga tegishli bo‘lib, uni kamsitilishiga qaratilgan bo‘lsa, madaniyat vazirligi bunday ijodlarni qo‘llab-quvvatlamaydi. Zero, xoh hajviya, xoh drama, askiya hamda satira orqali jamiyatdagi illatlarni davolashga qaratilgan mavzular yoki voqealar namoyon etilsa, uni hech narsa bilan yo‘q qilib bo‘lmaydi.
Tarixga bir nazar solsak, o‘zbek hajviy adabiyoti sermazmun tarixga egadir. Hajv, satira-voqelikni aks ettirishning alohida g‘oyaviy-badiiy prinsipi sifatida barcha sivilizatsiyalashgan xalqlar adabiyoti, shu jumladan, o‘zbek xalqining ham og‘zaki va yozma ijodlarida qadimdan katta o‘rin olib kelgan. Ijtimoiy illatlarning kulgili tanqidi bo‘lgan satira o‘zbek xalq ijodida ham keng tarqalgan edi. Nasriddin afandi, Aldar ko‘sa kabi to‘qima obrazlar hajviy, milliy qahramonlar o‘z zamonasining illatlarini xalq orasida askiyalar va hajviyalar bilan namoyish etishgan. Qadimdan xalqning ichida hajviya, satira, askiya kabi yumoristik ijodlar keng tarqalib, ommalashgan.
Xullas, madaniyat va san’at sohasida cheklovlar qo‘yilsa, u hech qachon rivojlanmaydi”, — deyiladi vazirlik munosabatida.
