Farg‘ona viloyatida 2020-yil boshida salkam 60 ming yosh xorijga chiqib ketgan

Farg‘ona viloyatida pandemiya sababli xorijdan qaytib kelgan yoshlarni ish bilan ta’minlashga alohida e’tibor qaratilmoqda. Bu haqda Farg‘ona viloyatidagi Prezident xalq qabulxonasi “Daryo”ga ma’lum qildi.

Ma’lum bo‘lishicha, 2020-yil boshida Farg‘ona viloyatida xorijga chiqib ketganlarning soni jami 58316 kishini tashkil etgan bo‘lsa, hozirda 7902 kishi qaytib kelgan. Shulardan 4699 nafari ishga joylashtirilgan.

“Xususan, 1100 nafari qishloq xo‘jaligi sohasiga, 380 nafari xizmat ko‘rsatish sohasiga, 219 nafari jamoatchilik ishlariga va 3 ming nafari qurilish sohasiga jalb etilgan”, — deyiladi qabulxona axborotida.

Umuman, Farg‘ona viloyatida 2019-yil yakunlari bo‘yicha jami 49 168 nafar ishsiz yoshlar ro‘yxatga olingan bo‘lsa, 2020 yilning yanvar—may oylarida ulardan 28 mingga yaqini (56 foizi)ning bandligi ta’minlangan. Xususan, 963 nafar ishsiz yosh qurilishga, 5173 nafari turli davlat tashkilot va korxonalariga, 4 307 nafari esa jamoatchilik asosida turli ishlarga jalb etilgan.