O‘zbekistonda “chiroyli” avtomobil raqamlari 6 ta toifaga ajratildi va ayrimlarining boshlang‘ich narxlari o‘zgardi

Vazirlar Mahkamasi qarori bilan ayrim “chiroyli” avtomobil raqamlarining boshlang‘ich narxlari va toifalari o‘zgardi. Bu haqda Adliya vazirligi xabar berdi.

Yangi tartibga ko‘ra, avval uchta toifaga ajratilgan “chiroyli” avtoraqamlar endi oltita toifaga ajratildi. Bundan tashqari, ayrim “chiroyli” raqamlarning boshlang‘ich narxlari va toifalari ham o‘zgardi.

Xususan, 333, 444, 666, 999 raqamlar kombinatsiyasi 1-toifadan 2-toifaga o‘tkazilgan bo‘lsa, 003, 004, 006, 008, 009, 030, 040, 303, 400, 404, 600, 900, 909 kabi raqamlar 2-toifadan 3-toifaga o‘tkazildi.

Toshkent shahridagi 2-toifa raqamlarining boshlang‘ich narxi agar ular har xil kombinatsiyadagi harflar bilan bo‘lsa, bazaviy hisoblash miqdorining 30 baravari (avval 40 baravari edi), bir xil kombinatsiyadagi harflar bilan bo‘lsa bazaviy hisoblash miqdorining 40 baravari (avval 50 baravar edi) etib belgilandi.

Shuningdek, oshirilgan to‘lov stavkalari bo‘yicha beriladigan I, IA, III, IIIA tipidagi avtotransport vositalari uchun ro‘yxatdan o‘tkazish davlat raqami belgilarining ro‘yxati ham e’lon qilindi.