Belarusdagi maktablarda o‘quv yili davom ettiriladi, o‘quvchilar ta’limni bevosita o‘quv muassasasiga borgan holda olishi mumkin. Bu haqda BELTA agentligi xabar qilgan.
O‘quvchilarning ta’lim jarayoni 20-apreldan qayta boshlanadi. Maorif vaziri Igor Karpenko o‘quv yili yakuni boshqa muddatga ko‘chirilmasligi va maktab o‘quvchilari ta’limni belgilangan muddatlarda yakunlashini bildirgan.
Vazirning so‘zlariga ko‘ra o‘quvchilarning 40 foizi maktablarga borib, ta’limni davom ettirishni rejalashtirgan, chekka qishloq hududlarida bu boradagi foiz ko‘rsatkichi nisbatan yuqori.
“Fuqarolarda, xususan, ota-onalarda o‘z bolasini maktabga jo‘natish yoki aksincha uyda olib o‘tirish borasida savollar paydo bo‘lishi tabiiy. Bolani yuborish yoki yubormaslik ota-onalarning ixtiyorida qolgan masala. Biz hech kimni majburlamaymiz”, — deya ta’kidlagan Karpenko.
Avvalroq Belarus prezidenti Aleksandr Lukashenko asta-sekin va xotirjam tarzda maktablarda kelasi haftadan o‘quv jarayonini qayta boshlash bo‘yicha topshiriq bergandi. Lukashenkoning ta’kidlashicha, maktablarda ta’lim olishi uchun imkoniyat bormi, demak, mamlakatdagi epidemiologik vaziyat barqaror va o‘quvchilar ta’limni davom ettirishi mumkin.
Mart oyi oxirida Lukashenko Belarusda COVID-19 infeksiyasi keltirib chiqarayotgan kasalliklar mavjud ekani, biroq karantin tartibi joriy qilinmasligini ma’lum qilgandi.
Mavzuga doir:
- Belarusda koronavirusga chalingan 29 kishi vafot etdi. Lukashenko ularning o‘limiga koronavirus sabab bo‘lmaganini aytdi
- O‘zbekiston Belarusga koronavirusga qarshi kurashda foydalanish uchun insonparvarlik yordamini jo‘natdi
- Belarusda koronavirus bilan kasallangan tibbiyot xodimlari soni 301 nafarga yetdi
- “Bechora, dosh bera olmadi”. Lukashenko Belarusda koronavirusdan vafot etgan birinchi bemor haqida
Izoh (0)