O‘zbekiston musulmonlari idorasi zakotga doir savollarga javob berdi

O‘zbekiston musulmonlari idorasi raisining birinchi o‘rinbosari Homidjon Ishmatbekov 16-aprel kuni AOKAda o‘tkazilgan brifing davomida bir qancha savollarga javob berdi. Bu haqda “Daryo” muxbiri xabar bermoqda.

Ma’lum qilinishicha, nisob (musulmonlarning zakot berish majburiyatini keltirib chiqaruvchi pul yoki mol-mulkining miqdori) har yili O‘zbekiston musulmonlari idorasi Fatvo hay’ati tomonidan Ramazon oyida e’lon qilinar edi. Lekin mamlakatda karantin e’lon qilinishi sababli zaruratsiz uydan tashqariga chiqish mumkin bo‘lmagan vaziyatda O‘zbekiston musulmonlari idorasi zakot nisobini Sha’bon oyida chiqarishga qaror qilgan.

Shuningdek, brifing davomida aynan zakot masalasida kelib tushgan savollarga ham to‘xtab o‘tildi.

Qo‘liga bir joydan 25 million so‘m kelib qolgan kishi zakot beradimi?

“Pul nisobga yetganidan keyin bir yil o‘tsagina, zakot farz bo‘ladi. Bir yildan oz vaqt davomida nisobdan kam bo‘lib qolsa, zakot farz bo‘lmaydi. Bunday zakotga yil hijriy sana hisobi bilan o‘lchanadi. Pul qo‘lga tushganidan keyin bir yil o‘tishi shart ekanligi quyidagi rivoyat bilan dalillanadi:

Hazrati Ali karramallohu vajhahudan rivoyat bo‘ladiki, “Bir yil to‘lmaguniga qadar mol-mulkdan zakot yo‘q”, deydilar. Ushbu mazmundagi Hazrati Alidan boshqa sahobalarda ham sahih asarlar mavjud. Bu garchi sahobalarning so‘zi bo‘lsa-da, ulamolar hukm jihatidan marfu’, ya’ni Payg‘ambar alayhissalomning so‘zlaridan kelib chiqqanini ta’kidlaydilar.”

Ota-ona, aka-uka, opa-singillar haqiqatan zakot olishga haqli bo‘lsa, ularga zakot berish mumkinmi?

“Zakotni o‘zaro tug‘ilish aloqasi bo‘lganlar, ya’ni ota-onasi, bobo-buvisi, o‘g‘il-qizlari va nabiralari, er-xotinlik aloqalari bo‘lganlar, ya’ni er yoki xotin bir-biriga berishi mumkin emas. Ammo aka-uka, opa-singillarga zakot berish mumkin. Zakot berish yaqin qarindoshlardan boshlansa ham Olloh taoloning buyrug‘i ado bo‘ladi, ham qarindosh-urug‘lik rishtalari mustahkamlanadi. Ya’ni silai rahimga amal qilingan bo‘ladi.”

Avvalroq O‘zbekiston musulmonlari idorasi 2020-yil uchun zakot miqdorini ma’lum qilgan edi. 7-aprel kuni O‘zbekiston musulmonlari idorasi karantinga doir fatvolarni e’lon qilgan.