AQSh prezidenti Donald Trampning aktivlarining umumiy qiymati oxirgi oylarda koronavirus pandemiyasi sabab 1 milliard dollarga pastlagan va bu sobiq biznesmenning avval faol bo‘lgan iqtisodiy sohalarida kuzatilgan, deb yozmoqda Forbes.

Foto: Getty Images

“Bir oy avval AQSh prezidentining boyligi 3,1 milliard dollar deb hisoblangandi. Endi ushbu raqam — 2,1 milliard dollarni tashkil qilmoqda”, — deyiladi Forbes xabarida.

AQSh prezidentining aktivlari kapitalizatsiyasi uning kompaniyalari faoliyat olib boradigan yo‘nalishlardagi narxlar o‘zgarishiga qarab baholangan. Jurnal ekspertlari tijoriy ko‘chmas mulk koronavirus pandemiyasi sabab inqirozni boshdan kechirmoqda. 1–18-mart kunlari bir nechta developerlik kompaniyalari xususan, Boston Properties hamda Vornado Realty Trust aksiyalari 37 foizga arzonlashdi, Tramp kompaniyasining asosiy ulushi aynan shu sohaga to‘g‘ri keladi.

Eng katta zarar Nyu-York va San-Fransiskodagi savdo hamda ofis ko‘chmas mulk sohalarida kuzatilgan. Bir oy ichida 700 million dollar yo‘qotildi, narxlar esa 1,9 milliarddan 1,2 milliard dollarga tushib qoldi. Tramp egalik qiladigan beshta shtatdagi turar joy narxlari 235 milliondan 148 milliongacha pastlagan. Mehmonxonalar biznesi ham jiddiy zarba qabul qilib oldi. Vashingtondagi mehmonxona va Mayamidagi kurortning umumiy qiymati 107 milliondan 38 million dollarga tushib qoldi. Gavayi, Urugvay, Hindiston va boshqa davlatlardagi brending va mehmonxonalar boshqaruvi 80 million dollarlik narxdan 42 million dollargacha pastlagan. AQShdagi o‘nlab golf-klublarning va Yevropadagi uchta obyektning umumiy qiymati ham 271 million edi va endi 217 million dollarni tashkil qilmoqda. Hashamdor uylar va boshqa mulklar narxi ham 348 millionlik qiymatdan endi 295 million dollarga tushgan.

Trampning faqat “pul yostiqchasi”gina barqaror holatda qoldi — inqirozgacha 160 million dollar naqd puli bo‘lgan prezident o‘sha pullarni o‘zgarmas qiymatda ushlab turibdi.

6-aprelda Oq uydan turib qilgan videobayonoti davomida Donald Tramp qorong‘i tunnel oxirida nur ko‘rinayotganini qayd etib, yaqin kelajakda Amerika xalqi koronavirus ustidan qozonilgan g‘alabadan faxrlanishi mumkinligini ta’kidlagandi.

AQSh prezidentining fikricha COVID-19 yuqtirib olish holatlari eng ko‘p uchrayotgan Nyu-York shtatida koronavirusdan vafot etganlar sonining kamayishi hukumatning mamlakatdagi vaziyatni o‘z boshqaruviga olganidan darak beradi.

Mavzuga doir: 

Avval Nyu-York hayvonot bog‘idagi yo‘lbars koronavirus yuqtirib olgani, Nyu-Yorkda ijtimoiy masofalanish qoidasini buzganlar ming dollar jarimaga tortilishi haqida xabar berilgan.