Norvegiyada bog‘cha, boshlang‘ich maktab va sartaroshxonalar qachondan ochilishi e’lon qilindi

Norvegiya hukumati koronavirus tarqalishiga qarshi joriy etilgan bir qator cheklovlar bekor qilinishini bildirdi, deb xabar beradi The Local.

20-apreldan boshlab bog‘chalar, 27-aprelda esa boshlang‘ich maktablar ochiladi. Shuningdek, 27-apreldan sartaroshlik kabi xizmat ko‘rsatish sohasidagi tadbirkorlik faoliyatlari qisman qayta ish boshlashi mumkin.

Shu bilan birga, mamlakat hukumati madaniy va sport tadbirlarini o‘tkazishga qo‘yilgan taqiqlarni 15-iyulga qadar uzaytirdi.

5,3 million aholiga ega Norvegiyada 5,9 ming kishida COVID-19 infeksiyasi aniqlangan, 88 kishi vafot etgan. O‘tgan bir hafta ichida har kuni 150-200 kishida koronavirus tasdiqlangan.