Sirdaryo viloyati Sardoba tumanida joylashgan oziq-ovqat do‘konida 28-mart, shanba kuni, soat 14:50 larda 28 yoshli D.A. sotuvchi bo‘la turib, karantin qoidalarini buzganligi aniqlandi.
Foto: “Daryo”
IIV matbuot xizmatining xabariga ko‘ra, u kirish-chiqish joylarini qo‘l yuvish yoki antiseptik vositalar bilan jihozlamagan, himoya qo‘lqoplarida bo‘lmay, tozalikka rioya qilmagan.
Shu sababli Ma’muriy javobgarlik to‘g‘risidagi kodeksning 54-moddasi (Epidemiyalarga qarshi kurash qoidalarini buzish)ga ko‘ra, ma’muriy javobgarlikka tortilgan.
Ushbu moddada belgilangan harakatlarni sodir etganlik uchun bazaviy hisoblash miqdorining 5 baravarigacha (27-mart holatiga ko‘ra, 1 115 000 so‘m) miqdorda jarima solishga sabab bo‘ladi.
Eslatib o‘tamiz, Shavkat Mirziyoyev epidemiyaga qarshi kurash qoidalarini buzganda javobgarlik kuchayishi to‘g‘risidagi qonunni imzolagandi. Qonunga ko‘ra, karantin qoidalarini buzganlik uchun jazo kuchaytirildi va jarimalar miqdori bir necha barobar oshirildi. Yuqumli kasallik haqida yolg‘on ma’lumot tarqatganlik uchun jinoiy javobgarlik joriy etildi.
Shuningdek, Prezident koronavirus masalasida O‘zbekiston xalqiga yana bir bor murojaat qildi. O‘zbekistonga koronavirusning kirib kelishi va tarqalishining oldini olish bo‘yicha maxsus komissiya koronavirusga qarshi karantin qoidalariga rioya qilishni so‘rab murojaat yo‘lladi.
Avvalroq O‘zbekistonda karantin qoidalariga amal qilmaslik bilan bog‘liq jami 12 484 ta holat aniqlangani xabar berilgandi. Unga ko‘ra, Sirdaryo viloyatida 16-martdan buyon bugungi kunga qadar karantin qoidalariga amal qilmaslik bilan bog‘liq jami 456 ta holat qayd etilgan.
