AQSh prezidenti Donald Tramp Xitoyni amerikalik harbiylar qasddan xitoyliklarga koronavirus yuqtirgani to‘g‘risida yolg‘on xabar tarqatganlikda aybladi. Bu haqda Tramp Oq uyda o‘tkazilgan brifing davomida ma’lum qildi, deb xabar beradi National Review.
“Xitoy bizning harbiylar ularga virus yuqtirgani haqida yolg‘on ma’lumotni tarqatdi. Bu yolg‘on. Bahslashish o‘rniga, men virus qayerdan chiqqanini aytishim kerak. U rostdan ham Xitoydan tarqaldi”, — deydi Tramp.
Avvalroq, Xitoy Tashqi ishlar vakili Chjao Litszyan koronavirusni Uxanga amerikalik harbiylar olib kelgan bo‘lishi mumkin degan fikrni bildirgan edi. U bu taxminni AQSh kasalliklarni oldini olish markazi rahbari Robert Redfild Vakillar palatasida so‘zlagan nutqiga asoslanib aytgan. Robert Redfild o‘z nutqida grippdan vafot etgan bir necha amerikaliklarning jasadlari tekshirilganda ularning tanasida koronavirus topilganini aytgan.
Xitoy TIV vakili “AQShda ‘nolinchi bemor’ qachon paydo bo‘lgani, infeksiyani yuqtirib olganlar soni va ular qaysi shifoxonaga joylashtirilgani haqida savolni o‘rtaga tashlagan. Ushbu bayonotdan so‘ng, AQSh Davlat departamenti Xitoy elchisi Suy Tyankayni chaqirib olgan. U bilan davlat kotibining maslahatchisi Devid Stilvell gaplashib, xitoylik diplomatga faktlarni taqdim etgan.
Xitoy Tashqi ishlar vazirligida bu ma’lumot tasdiqlanmagan. Vazirlik virusning kelib chiqishi bo‘yicha olimlar shug‘ullanishi lozimligini ta’kidlagan.
So‘nggi ma’lumotlarga ko‘ra, Xitoyda koronavirusni yuqtirganlar soni 80 881 nafarni tashkil etmoqda. Butun dunyoda kasallanganlar soni esa 179 ming nafarga yetgan.
Izoh (0)