Toshkent shahridagi Yunusobod metro yo‘li qurilishida 2019-yilning 18-dekabr kuni sodir bo‘lgan yer o‘pirilishi oqibatida halok bo‘lgan Zarif Karimovning oila a’zolariga kompensatsiya to‘landi. Bu haqda “O‘zbekiston temir yo‘llari” AJ matbuot xizmati xabar berdi.

Foto: Sputnik

Ma’lum qilinishicha, hodisani tergov qilgan maxsus komissiya boquvchisini yo‘qotgan Zafar Karimovning oila a’zolariga to‘lanadigan kompensatsiya miqdorini 281 million 670 ming 972 so‘m etib belgilagan. Bundan tashqari, Zafar Karimovni dafn etish marosimining xarajatlarini qoplash uchun sakkiz million so‘m hamda marhumning qaramog‘ida bo‘lgan besh nafar oila a’zosining har biriga 650 608 so‘m miqdoridagi oylik to‘lov belgilangan.

Qayd etilishicha, to‘lovlar 12-fevral, chorshanba kuni, ish beruvchi va sug‘urta qiluvchi kompaniya “Temiryo‘lsug‘urta” tomonidan amalga oshirilgan.

Maxsus komissiya ushbu hodisaning boshqa besh nafar qurbonining oilalariga ham kompensatsiya miqdorlarini belgilab bergan, to‘lovlarni ular bilan ish shartnomasini tuzgan kompaniya amalga oshirishi belgilangan.

Halokatdan so‘ng pudratchi-quruvchi tashkilotlar tomonidan qurbonlarning oila-a’zolari va yaqinlariga 100 million so‘mlik dastlabki tovon pullari to‘lab berilgan. Shu bilan birga, amaldagi qonunchilikka asosan qo‘shimcha kompensatsiya pullari to‘lab berilishi ma’lum qilingan edi.

Eslatib o‘tamiz, mazkur halokat oqibatida olti nafar ishchi qurbon bo‘lgan edi.