Bugun, 18-fevral kuni, xalq deputatlari Boyovut tumani Kengashining navbatdan tashqari sessiyasi o‘tkazilib, unda tashkiliy masala ko‘rilmoqda.
Sirdaryo viloyati hokimligi axborot xizmatining xabar berishicha, unda deputatlar Ulmasjon Mamadaminov boshqa ishga o‘tayotganligi munosabati bilan Boyovut tumani hokimi lavozimiga Dilfuza Uralova Boyovut tumani hokimi etib tayinlash to‘g‘risidagi viloyat hokimining qarorini bir ovozdan tasdiqladi.
Dilfuza Uralova 2012-yilda “Shuhrat” medali bilan taqdirlangan. Xalq deputatlari Sirdaryo viloyati Kengashi deputati, Oliy Majlis Senati a’zosi hisoblanadi.
1985—1990-yillar mobaynida Guliston davlat universiteti talabasi, 1990—2001-yillarda Sirdaryo viloyati Mirzaobod tumani 10-umumiy o‘rta ta’lim maktabi o‘qituvchisi, 2001—2010-yillarda Sirdaryo viloyati Mirzaobod tumani 10-umumiy o‘rta ta’lim maktabi direktorining ma’naviy-ma’rifiy ishlar bo‘yicha o‘rinbosari, direktori bo‘lgan.
2010—2015-yillarda Sirdaryo viloyati Mirzaobod tumani hokimining o‘rinbosari, xotin-qizlar qo‘mitasi raisi lavozimida ishlagan. 2015—2017-yillar mobaynida Oliy Majlis Qonunchilik palatasi deputati bo‘lgan. 2017-yildan shu kunga qadar Sirdaryo viloyati hokimining o‘rinbosari, xotin-qizlar qo‘mitasi raisi lavozimida ishlab kelgan.
Oilali, 4 nafar farzandi bor.
Boyovut tumaniga ayol kishi hokim etib tayinlanishi munosabati bilan Telegramdagi “Ne molchi” kanali O‘zbekiston tarixida avval hokim bo‘lib ishlagan 4 nafar ayol haqida eslatib o‘tdi.
- Manzura Egamova 1993-yildan 2005-yilgacha 12 yil davomida Andijon viloyati Jalaquduq tumani hokimi bo‘lgan;
- Shakarjon Xo‘janiyozova Xorazm viloyati Bog‘ot tumani hokimi bo‘lgan;
- Rahima Hakimova Samarqand viloyati Samarqand tumani hokimi bo‘lgan.
- Tohiraxon Marizayeva Namangan viloyati Kosonsoy tumanida 1996-yildan 2000-yilgacha hokim vazifasida ishlagan.
Izoh (0)