Surxondaryo viloyatining Oltinsoy tumani “Xalqobod” mahallasida 14-fevral kuni aholi va hokimiyat vakillari o‘rtasida to‘qnashuv yuz berdi. Ushbu holat yuzasidan IIV va Bosh prokuratura bayonot berdi.

Rasmiy bayonotlarga ko‘ra, olti fuqaro “Oq-oltin manzarasi” fermer xo‘jaligiga qarashli paxta va g‘allaga mo‘ljallangan ekin yer maydonining 0,39 gektar qismiga yashash imkoniyati mavjud bo‘lmagan uy-joy qurib olgan. Ushbu uy-joy egalariga dastlab 8-fevral kuni bu inshootlarni fuqarolar o‘z hisobidan buzib tashlab, ekin maydonini bo‘shatishlari, fuqarolarga boshqa joydan yer berilishi aytib, tushuntirilgan. Bosh prokuratura axborotiga ko‘ra, fuqarolar ikki kun muhlat so‘ragan.

Mutasaddilar 14-fevral kuni muammoli joyga qaytib kelganida, uy-joylarning uchtasiga aholi ko‘chib kirib olgani ma’lum bo‘lgan; Bosh prokuraturaning yozishicha, fuqarolar va ularning qarindoshlari qo‘llarida benzin, tayoq, belkurak, tosh va boshqa narsalar bilan qurollangan holda ishchi guruh oldiga chiqqan; jarayonda ikki nafar IIB xodimi va bir fuqaro tan jarohati olgan.

Rasmiylarning bayonotlari ortidan jurnalist va bloger Qobil Xidirovning Telegram‘dagi @davletovuz kanalida munosabat e’lon qilindi. Unda, jumladan, rasmiy axborotlardan “yana odamlarimizni aybdor qilish ohangi” sezilayotgani alohida ko‘rsatib o‘tilgan. Bloger munosabati bilan quyida to‘liq tanishish mumkin.

Shunaqa bayonotlarni o‘qib, har doimgidek yana odamlarimizni aybdor qilish ohangini sezish mumkin.

Bu gal fuqarolar oddiy davlat xodimlariga emas, tuman hokimi, prokurori, tuman ichki ishlar bo‘limi boshlig‘i singari amaldordan iborat ishchi guruh talabiga ko‘nmayapti — kazo-kazo amaldorlar oddiy odamlar bilan muloqot qila olmayapti, uning muammosiga jo‘yali yechim topib bera olmagan. Bayonotda aytilganidek, fuqarolarga “tushuntirilgan”, xolos.

Odam uchun uydan aziz, muqaddas narsa yo‘q. Uy barcha mulklardan muqaddas. Bu uy qonuniy yoki noqonuniy qurilgani elliginchi masala. Tuman hokimi, prokurori, IIB boshlig‘ining xatti-harakati balki qonuniydir, ammo o‘sha yerdagi odamlar uchun adolatsiz bo‘lgani aniq.

Bu yerda prokuratura qonunning ortiga yashirinib, o‘zining, boshqa mayda amaldorlarning harakatlarini oqlab, odamlarni aybdor qilishga urinar ekan, o‘tgan yilgi “snos”lar bilan bog‘liq voqealar takrorlanmasligiga kim kafolat beradi? Prokuratura xodimi ishtirok etgan, voqea rivojidan manfaatdor bo‘lgan idorani o‘zini o‘zi nechog‘li xolis tekshira oladi?

Davlatning eng katta boyligi bu — xalq. Yer xalqdan aziz bo‘libdimi? Ko‘z o‘ngimizda monopol tadbirkorlarimizga barcha resurslarimiz beminnat taqdim etilayotgan, bir bojxona posti boshlig‘i uyidan 400 ming dollar chiqayotgan, shundoq ham rentabelli yirik korxonalarimiz o‘zimizning “qorako‘z investorlar”ga nol qiymatda berilayotgan bir paytda, hokimiyatning kuchi yana o‘sha himoyasiz, aldangan fuqarolarga yetayapti, xolos.

Bu jarayonlar odamda xavotir uyg‘otayapti. Ertaga qayerda xato qilgan edik, demasdan, hozir ko‘zni ochish kerak.

Bularning barchasi IMHO, albatta.

@davletovuz