AQSh KXDRga Stokgolmdagi muzokaralarni davom ettirish taklifini bildirdi

AQSh prezidenti administratsiyasi Shimoliy Koreyaga murojaat qilib, oxirgi marta oktabrda o‘tkazilgan muzokaralarni Stokgolmda qayta tiklash taklifini bildirdi, deb xabar beradi “Kommersant”.

“Biz Shimoliy Koreya tomoni bilan bog‘lanib, oktabr oyining boshida qolib ketgan muzokaralarni Stokgolmda davom ettirish taklifini bildirdik. Biz turli kanallar bilan KXDR rahbari Kim Chen Inning denuklearizatsiya bo‘yicha va’dasida turishi uchun muzokaralarni kerakli oqimga qaytarishga tayyor ekanligimizni tushunishiga shama qildik”, — deydi AQSh prezidentining milliy xavfsizlik bo‘yicha yordamchisi O’Brayen.

Uning qo‘shimcha qilishicha, Kim Chen In Vashingtonga va’da qilingan “Rojdestvo sovg‘asi”ni hali ham olib kelmaganiga “ehtiyotkorona optimizm” bilan yondashadi. Donald Tramp Kim Chen In bayramga vaza yuborishini taxmin qilgandi. “Biz vaza ham, boshqa biror Rojdestvo sovg‘asini ham olmadik. Biz buni ijobiy baholaymiz”, — deydi yordamchi.

Eslatib o‘tamiz, 2019-yilning iyun oyida ikki mamlakat rahbarlari birinchi bor Janubiy va Shimoliy Koreya chegarasidagi qurolsizlangan hududda uchrashishgan edi. Sammit bir necha daqiqa davom etganiga qaramay Kim Chen In va Donald Tramp muzokara o‘tkazish uchun ishchi guruh tuzishga kelishib olgandi. Oktabr oyida Stokgolmda tomonlar dastlabki muzokaralarni o‘tkazdi. Noyabrda esa KXDR Tashqi ishlar vazirligi Tramp “KXDRga nisbatan dushmanlik siyosatini to‘liq bekor qilmagunicha” AQSh prezidenti bilan uchrashmasligini ma’lum qilgandi.