Peterburgda o‘zbekistonlik erkakni mashinada o‘rmonga olib qochib, kaltaklab, tunab ketgan shaxslar 2-dekabr, dushanba kuni qo‘lga olindi. “Fontanka.ru”ning xabar berishicha, ularning deyarli barchasi jabrlangan erkakning vatandoshlari bo‘lib, ular orasida ayollar ham bor.

Qayd etilishicha, qo‘lga olinganlar 24 va 37 yoshli o‘zbekistonlik ishsiz fuqarolar va ularning 34 yoshli boshpanasiz vatandoshidir. Shuningdek, qo‘lga olinganlar orasida Rossiya va Qirg‘izistonning ishsiz fuqarolari ham bor.

Ularning barchasi 1 hafta avval 34 yoshli o‘zbekistonlik mehnat muhojiriga hujum qilganlikda gumonlanib, 2 kunga hibsga olingan. Erkak kuch bilan Lada mashinasiga o‘tqazilib o‘rmonga olib ketilgan. U yerda erkak kaltaklangan, pichoq va to‘pponcha bilan qo‘rqitilib, 36 ming rublni bank kartasiga o‘tkazishga majburlangan. Shundan so‘ng jabrlangan erkak metro bekatlaridan birining yonida tashlab ketilgan.

Politsiyaga jabrlangan erkakning do‘sti murojaat qilgan.

Jinoiy qidiruv xodimlarining fikriga ko‘ra, qo‘lga olingan jinoiy guruh bu tarzdagi jinoyatni birinchi marta sodir etishi emas. Ularning boshqa jinoyatlari aniqlanmoqda.