Bosh prokuratura huzuridagi Departamentning Surxondaryo viloyat boshqarmasi tomonidan o‘tkazilgan “Surxon tongi” va “Zarya Surxana” gazetalari birlashgan tahririyatining mansabdor shaxslariga nisbatan jinoyat ishi qo‘zg‘atildi. Bu haqda Bosh prokuratura matbuot xizmati “Daryo”ga ma’lum qildi.
Mansabdor shaxslar o‘z mansab vakolatini suiiste’mol qilib, 2017—2018-yillar va joriy yilning o‘tgan davrida gazetalar obunasi uchun kelib tushgan 2,3 milliard so‘m pul mablag‘larini savdo va qurilish faoliyati bilan shug‘ullanuvchi hamda avtomashinalarga texnik xizmat ko‘rsatuvchi xo‘jalik yurituvchi subyektlarga moliyaviy yordam sifatida o‘tkazib berib, davlat va jamiyat manfaatlariga juda ko‘p miqdorda zarar yetkazganliklari aniqlangan.
Shuningdek, tahririyat mansabdor shaxslari “S.E.M” MChJ mansabdor shaxslari bilan oldindan til biriktirib, 2018-yilda fermer xo‘jaliklarining xabardorligisiz “Surxon tongi” va “Zarya Surxana” gazetalariga obuna tashkil qilish uchun 150 million so‘m pul mablag‘larini jamiyat hisob raqamiga o‘tkazilishiga erishib, amalda fermer xo‘jaliklariga gazetalarni yetkazib bermaganligi fosh etilgan.
Shu bilan birga, “S.E.M.” MChJ mansabdor shaxslari jinoiy harakatlarini davom ettirib, 2017—2018-yillar va 2019-yilning 9 oyida jamiyat hisob-raqamiga xo‘jalik yurituvchi subyektlardan davriy nashrlarga obuna uchun kelib tushgan 5,4 milliard so‘m pul mablag‘laridan 1,9 milliard so‘mini boshqa maqsadlarda ishlatib yuborganliklari ma’lum bo‘lgan.
Mazkur holatlar yuzasidan “Surxon tongi” va “Zarya Surxana” gazetalari birlashgan tahririyati hamda “S.E.M” MChJ mansabdor shaxslari va boshqalarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlarini o‘tkazilmoqda.
Izoh (0)