O‘zbekistonda issiqlik ta’minoti to‘lovlarida o‘zgarish bo‘lishi mumkin

O‘zbekiston Uy-joy kommunal xo‘jaligi vazirligi “Issiqlik ta’minoti tizimini takomillashtirish va issiqlik ta’minoti korxonalarini moliyaviy sog‘lomlashtirish bo‘yicha qo‘shimcha chora-tadbirlar to‘g‘risida”gi Prezident qarori loyihasi muhokamaga qo‘yildi.

Unga ko‘ra, 2020-yil 1-yanvardan boshlab markazlashgan issiqlik ta’minoti xizmatlari uchun iste’molchilar bilan hisob-kitoblar isitish davrining har bir kuni uchun isitilayotgan 1 kvadrat metr hisobidan kelib chiqib to‘lash tizimiga o‘tkaziladi.

Bundan tashqari, iste’molchilarga issiqlik ta’minoti xizmatlari uchun tariflarni shakllantirish va belgilashda issiqlik ta’minoti korxonalarini rivojlantirish va modernizatsiya qilish xarajatlari, shuningdek, ishlab chiqarish xarajatlarini kamaytirish va issiqlik energiyasi tannarxini pasaytirish hisobiga ular tomonidan ko‘rsatadigan xizmatlar tannarxini qoplash mexanizmlarini bosqichma-bosqich joriy etish hisobga olinadi.

Shuningdek, aholi uchun issiqlik energiyasi va issiq suv uchun pasaytirilgan tariflarni qo‘llash natijasida kelib chiqadigan zararlar Qoraqalpog‘iston Respublikasi budjeti, viloyatlar va Toshkent shahar mahalliy budjetlari hisobidan qoplananishi belgilanmoqda.

Eslatib o‘tamiz, O‘zbekiston Prezidenti 2018—2022-yillarda issiqlik ta’minoti tizimini rivojlantirish dasturi to‘g‘risida”gi qarorni imzolagan edi. Ushbu qarorda dasturning o‘z vaqtida va samarali amalga oshirilishi uchun O‘zbekiston Uy-joy kommunal xizmat ko‘rsatish vazirligi, Qoraqalpog‘iston Vazirlar Kengashi, viloyatlar va Toshkent shahri hokimliklari mas’ul etib, shuningdek, issiqlik ta’minoti xizmatlari ko‘rsatish (ishlab chiqarish, tashish, taqsimlash va iste’mol qilish)ning barcha bosqichlari inobatga olingan holda loyihalarni amalga oshirishga kompleks yondashuvni ko‘zda tutuvchi Issiqlik ta’minoti tizimini kompleks rivojlantirish va modernizatsiya qilish konsepsiyasini ishlab chiqish belgilandi.