Mudofaa vazirligi harbiy qism va bo‘linmalariga yangi harbiy texnikalar topshirildi (foto)

Chirchiq dala-o‘quv maydonida Mudofaa vazirligi harbiy qism va bo‘linmalariga zamonaviy avtomashinalarning kalitlari topshirildi. Bu haqda “Daryo”ga Mudofaa vazirligi Axborot va ommaviy kommunikatsiyalar departamenti xabar berdi.

Tantanali tadbirda Mudofaa vazirining o‘rinbosari polkovnik Oybek Ismoilov, Mudofaa sanoati davlat qo‘mitasi raisi o‘rinbosari Hotamjon Yusupov ishtirok etdi.

Yangi harbiy avtomashinalarni qabul qilib olgan Vatan himoyachilari quvonchi ortgani holda zimmalarida mas’uliyat yuki oshganini qayta-qayta ta’kidladilar. Zero, bugungi kun armiyasi haqida gap ketganda ko‘z oldimizga birinchi galda zamonaviy harbiy texnikalar va qurol-aslahalar namoyon bo‘ladi. Har qanday mamlakat taraqqiyotini mudofaa qudratisiz tasavvur etib bo‘lmaydi. Barcha sohalardagi barqaror rivojlanish negizida tinchlik, xavfsizlikni ta’minlash turibdi, deyiladi xabarda.

“Harbiy avtomashinalarning kalitlarini egalariga topshirish rosmana tantana tusida o‘tdi. Harbiy qism va muassasalardan yangi texnikalarni qabul qilish uchun kelgan yurt himoyachilari  islohotlarning yana bir amaliy namunasiga guvoh bo‘ldi.  Boisi bugun qo‘shinlarning moddiy-texnik bazasini mustahkamlash, mavjudlarini modernizatsiya qilish, harbiy qism va bo‘linmalarni mutlaqo yangi, zamonaviy qurol-yarog‘ hamda harbiy texnikalar bilan ta’minlashga yuksak e’tibor qaratilmoqda”, — deyiladi xabarda.

Shuni alohida ta’kidlash kerakki, bugun harbiy qism va muassasalarga  topshirilayotgan yangi texnikalarning barchasi zamon talablarga to‘liq javob beradi. Xususan, bu harbiy texnikaning afzalliklari juda ko‘p. U o‘z vaznidan tashqari 700 kilogramm yuk ko‘tarish imkoniyatiga ega. Yo‘lovchi sig‘imi 5 kishini tashkil etsa, yuk xonasiga 10 nafar harbiy xizmatchini oladi. Mashina 110 ot kuchiga ega bo‘lib, eng yuqori tezligi soatiga 160 kilomterni tashkil qiladi.