“Posboniman, muqaddas yurtning” ko‘rik-tanlovi g‘oliblari taqdirlandi

O‘zbekiston Yozuvchilar uyushmasida Mudofaa vazirligi hamda qator vazirliklar hamkorligida o‘tkazilgan “Posboniman, muqaddas yurtning” ko‘rik-tanlovi g‘oliblarini taqdirlashga bag‘ishlangan tantanali tadbir bo‘lib o‘tdi. Bu haqda Mudofaa vazirligi axborot va ommaviy kommunikatsiyalar departamenti “Daryo”ga ma’lum qildi.

Tanlov uch bosqich, ya’ni Qurolli Kuchlar tizimi harbiy xizmatchilari, ularning oila a’zolari hamda professional shoirlar o‘rtasida she’rlar va insho yozish borasida o‘tkazildi.

Tantanali marosimni Yozuvchilar uyushmasi raisi, O‘zbekiston xalq shoiri Sirojiddin Sayyid kirish so‘zi bilan ochib, mamlakat tinchligini himoya qilayotgan harbiy xizmatchilarning mashaqqatli va sharafli kasblari, ularga yaratilayotgan imkoniyatlar hamda mazkur tanlovning ahamiyati haqida to‘xtaldi.

Shundan so‘ng, tanlov g‘oliblari taqdirlandi. Birinchi bosqich natijalariga ko‘ra:

• 1-o‘rin — Davlat xavfsizlik xizmati instituti xodimining farzandi Farangiz Sharipova;
• 2-o‘rin — Ichki ishlar vazirligi xizmatchisi Dilnoza Yoqubova;
• 3-o‘rin — Davlat bojxona qo‘mitasi Bojxona instituti kursanti Madrahim Temurov.

Ikkinchi bosqich natijalari:

• 1-o‘rin — Mudofaa vazirligidan kichik serjant Qayum Mahkamov;
• 2-o‘rin — Davlat bojxona qo‘mitasi “Qarshi” temiryo‘l chegara bojxona posti inspektori Dilnoza Arabova;
• 3-o‘rin — Davlat xavfsizlik xizmati harbiy xizmatchisi Husanboy Abdulhayev.

Professional ijodkorlar o‘rtasidagi uchinchi bosqichda 3-o‘rinni shoir, Yozuvchilar uyushmasi a’zosi Zikrilla Ne’mat, 2-o‘rinni shoir Iskandar Rahmon, birinchi o‘rinni esa yosh ijodkor, Erkin Vohidov nomidagi mediamarkaz rahbari Alisher Boymurodov egalladi.

Barcha g‘olib va sovrindorlarga esdalik sovg‘alari hamda pul mukofoti topshirildi.

Tadbirda Qurolli Kuchlar markaziy ashula va raqs ansambli xonanda va raqqosalari tomonidan yangragan dilrabo qo‘shiqlar, go‘zal raqslar barchaga xush onlarni taqdim etdi.