Qo‘qon Xalqaro hunarmandchilik festivali har ikki yilda o‘tkaziladigan bo‘ldi

Xalqaro hunarmandchilik festivalini o‘tkazib borishga oid chora-tadbirlar to‘g‘risida O‘zbekiston Prezidenti farmoni qabul qilindi. Bu haqda Adliya vazirligining Telegram’dagi “Huquqiy axborot” kanali xabar berdi.

Farmonga muvofiq, har ikki yilda bir marta sentabr oyida Qo‘qon shahrida Xalqaro hunarmandchilik festivali o‘tkaziladi.

Shuningdek, festival doirasida “Hunarmandchilik va xalq amaliy san’atini rivojlantirish istiqbollari” mavzusidagi ilmiy-amaliy konferensiya ham o‘tkaziladi.

Festivalning asosiy vazifalaridan biri hunarmandlarni har tomonlama qo‘llab-quvvatlash, boy madaniy merosni dunyo hamjamiyati o‘rtasida targ‘ib etishdan iborat.

Eslatib o‘tamiz, joriy yilning sentabr oyida bo‘lib o‘tgan I Xalqaro hunarmandchilik festivali davomida Butunjahon hunarmandlarining Osiyo—Tinch okeani kengashi Qo‘qon shahrini Butunjahon hunarmandlar shaharlari ro‘yxatiga kiritdi. Sohibqiron Amir Temur muhr-uzugi nusxasini yaratgan qashqadaryolik hunarmand Sharifjon Raupov festivalda 78 ta mamlakatdan ishtirok etgan yosh hunarmandlarning eng kuchlisi deb topildi.