Moskva muftiysi: Ba’zan rossiyaliklar ko‘pxotinlilikdan ko‘ra bir jinslilar nikohi qonuniylashtirilishini qabul qilishi osonroqdek tuyuladi

Muftiyga ko‘ra, uning taklifi jamoatchilik o‘rtasida bahs-munozaralarga sabab bo‘lgan, chunki “ko‘pchilik faqat shov-shuvli sarlavhalarga e’tibor qaratadi, biroq vaziyatni umumiy tahlil qilishni istamaydi”. Aslida bu fikr nafaqat diniy, balki ijtimoiy jihatdan ham ahamiyatga ega.

“Ba’zan rossiyaliklar ko‘pxotinlilikdan ko‘ra bir jinslilar nikohi qonuniylashtirilishini qabul qilishi osonroqdek tuyuladi. Vaholanki, bu yo‘l jamiyatni halokatga yetaklaydi”, — dedi Ildar Alyautdinov.

Moskva muftiysi Rossiyada ko‘pxotinlilikni qonuniylashtirish fikrini 25-sentabr kuni bildirgan va buni mamlakatda erkaklar yetishmasligi bilan bog‘liq ko‘plab ijtimoiy muammolarga yechim sifatida izohlagandi.

Rossiya Davlat dumasida mazkur tashabbus tanqid ostiga olindi. Oila, ayollar va bolalar masalalari qo‘mitasi raisi Tamara Pletnevaning aytishicha, Rossiyada ko‘pxotinlilikni nafaqat aksariyat fuqarolar, hatto ko‘pchilik rossiyalik musulmonlar ham qo‘llab-quvvatlamaydi.