25-iyul kuni Oliy Majlis Senatida Sud-huquq masalalari va korrupsiyaga qarshi kurashish qo‘mitasining majlisi bo‘lib o‘tdi. Bu haqda O‘zbekiston Oliy Majlis Senati ma’lumotlariga tayanib O‘zA xabar qiladi.
Unda Uy-joy kommunal xizmat ko‘rsatish vazirligining 2019-yil birinchi yarim yilligida amalga oshirilishi belgilangan maqsadli vazifalarni bajarish yuzasidan hisoboti eshitildi. Majlisda Qo‘mita a’zolari, vazirlik va idoralar vakillari, shuningdek ommaviy axborot vositalari xodimlari ishtirok etdi.
2019-yil davomida Uy-joy kommunal xizmat ko‘rsatish vazirligi zimmasiga 28 ta maqsadli vazifa yuklatilgan bo‘lib, shundan 8 tasi joriy yilning birinchi yarim yilligida bajarilishi kerak bo‘lgan.
Taqdim etilgan ma’lumotlar o‘rganilganda 8 ta topshiriqdan bor-yo‘g‘i 1 tasi bajarilgani aniqlangan. Xususan, Buxoro va Toshkent viloyatlarining 8 ta qozonxona va 6,79 km issiqlik tarmoqlarini foydalanishga topshirish vazifasi bajarilmagan, zamonaviy ichimlik suvi o‘lchash asboblari va uskunalarini xarid qilish uchun moliyalashtirish manbalari bugungi kunga qadar aniqlanmagan, mavjud normativ-huquqiy hujjatlar huquqiy va texnik xatlovdan o‘tkazilmagan hamda “Issiqlik ta’minoti to‘g‘risida”gi qonun loyihasi joriy sanaga qadar ishlab chiqilmagan. Samarqand, Buxoro, Namangan va Qarshi shaharlarining suv ta’minoti va kanalizatsiya inshootlarini boshqaruvga berish bo‘yicha tanlov o‘tkazilmaganligi haqida ma’lumotlar keltirib o‘tildi.
Shuningdek, majlisda vazirlik tomonidan 2019-yil davomida amalga oshirilishi ko‘zda tutilgan 12 ta vazifaning ham ijrosi sust darajada ekanligi aytib o‘tildi.
Tadbirda Qo‘mita a’zolari tomonidan mamlakatda aholiga kommunal xizmat ko‘rsatish sohasidagi mavjud muammolarga ham atroflicha to‘xtalib o‘tildi va dasturlar ijrosini keng miqyosda bajarish, sohani rivojlantirish bo‘yicha barcha zarur choralar ko‘rish lozimligi ta’kidlandi. Bu borada aniq taklif va tavsiyalar berildi.
Izoh (0)