Malayziya O‘zbekistondan sulili pechenyelar xarid qilmoqchi
Yaqinda Malayziya poytaxti Kuala-Lumpur shahrida “MIHAS-2019” 16—Xalqaro halol mahsulotlar ko‘rgazmasi bo‘lib o‘tdi. Bu haqda “Xalq so‘zi” xabar beradi.
Mezbon davlat xalqaro savdo va sanoat vazirligi hamda Tashqi savdoni rivojlantirish korporatsiyasi (MATRADE) tomonidan 2004-yildan buyon har yili tashkil etiladi. Mazkur tadbir o‘z yo‘nalishida Janubi-Sharqiy Osiyodagi eng yirik forum hisoblanadi.
Bu galgi ko‘rgazmada oziq-ovqat mahsulotlari, ichimliklar, halol kosmetika, islom modasi, to‘qimachilik va dori vositalari, turizm, moliya, logistika va elektron tijorat jabhasidagi xizmatlar taqdim qilindi. Unda 800 dan ziyod mashhur kompaniyalar o‘z mahsulotlari bilan qatnashgan bo‘lsa, bularni ko‘rish uchun dunyoning 80 davlatidan 23 mingdan ortiq kishi tashrif buyurdi.
Tashqi ishlar vazirligi ma’lumotiga ko‘ra, ushbu nufuzli anjumanda respublikaning Malayziyadagi elchixonasi ham o‘z milliy stendi bilan ishtirok etdi. Mamlakat oziq-ovqat sanoati vakillari, xususan, “Elite Food Group” va “For Tea” kompaniyalari mahsulotlari ko‘pchilikka manzur bo‘ldi. Malayziya, Singapur, Indoneziya va Xitoy biznes doiralarida O‘zbekiston mahsulotlarining yuqori ta’m sifatiga ega ekanligini alohida e’tirof etishgani buning tasdig‘idir.
Jumladan, O‘zbekistonda ilg‘or va innovatsion texnologiyalar asosida ishlab chiqarilgan bir martalik ketchup, mayonez, asal va souslar dunyodagi yetakchi aviakompaniyalar, mehmonxona va tez ovqatlanish restoranlari e’tiborini o‘ziga tortdi. Qolaversa, ko‘rgazmada hozir bo‘lgan jahonga mashhur qahvaxonalar tarmog‘i mutasaddilari kelgusida Janubi-Sharqiy Osiyo mamlakatlari hududlarida sotish uchun O‘zbekistonda tayyorlangan turli pechenyelarni xarid qilishga qiziqish bildirdi.
“MIHAS-2019” yakunida O‘zbekiston vakillari Malayziya kompaniyalari bilan o‘zaro hamkorlik bo‘yicha dastlabki shartnomalarni imzoladi. Jumladan, “Elite Food Group” MChJ Malayziyaning Air Asia aviakompaniyasi bilan hamda Malayziya, Singapur va Indoneziyadagi tez ovqatlanish restoranlariga mahsulotlarni yetkazib berish bo‘yicha Batavia Indo Global PT bilan ham kelishuvga erishdi. Shuningdek, Old Town kompaniyasi qahvaxonalari, Malayziya bozorlariga sulili va shokoladli pechenyelar sotish, 2019-yil II-III choraklarida O‘zbekistonga malayziyalik 400-500 nafar sayyohlarni yuborishga oid bitimlar qabul qilindi.
