Samarqand shahrida hozirgi kunda qidiruvdagi shaxslar soni 332 nafarni tashkil qiladi. Ularning 82 nafarini ayollar, 250 nafarini erkaklar tashkil qiladi. Qidiruvdagi shaxslarning 4 nafariga nisbatan tilxat ehtiyot chorasi qo‘llanilib, 228 nafariga qamoq ehtiyot chorasi qo‘llanilgan. Bu haqda qidiruvdagi shaxslarni yashash manziliga qaytarish bo‘yicha ularning oila a’zolari va yaqin qarindoshlari bilan o‘tkazilgan uchrashuvda ma’lumot berib o‘tildi. Bu haqda Samarqand viloyati IIB “Daryo”ga ma’lum qildi.
Qidiruvdagi shaxslarning oila a’zolari va yaqin qarindoshlari bilan navbatdagi uchrashuvda Samarqand shahar hokimi Furqat Rahimov, Samarqand viloyati prokurorining birinchi o‘rinbosari Sirojiddin Eshquvvatov, Samarqand viloyati jinoyat ishlari bo‘yicha sud raisining o‘rinbosari O‘tkir Mamadaliyev hamda Samarqand viloyati IIB boshlig‘ining birinchi o‘rinbosari Farhod Hasanovlar ishtirok etgan.
Viloyat IIB matbuot xizmatining ma’lum qilishicha, qidiruvda bo‘lgan shaxslarning 40 nafarini diniy ekstremizm oqimi a’zolari tashkil qiladi. 8 nafarini chet el fuqarolari, 12 nafarini chet el fuqaroligini olganlar va 5 nafarini boshqa viloyatlardan kelib jinoyat sodir etib qidiruvda bo‘lgan shaxslar tashkil qiladi.
Hozirgi kunda 14 nafar qidiruvdagi shaxs chet davlatlariga ekstraditsiya qilishlik uchun vaqtincha jazo muddatini o‘tamoqda. Mazkur 14 nafar qidiruvdagi shaxsning olib kelish tartibi 1993-yil 22-yanvar kunidagi davlatlararo Minsk konvensiyasiga asosan olti oydan bir yil muddat ichida yashash manziliga olib kelinadi.
Ma’lumot uchun, qidiruvda bo‘lgan shaxslarni manziliga qaytarish ularning oila a’zolari va yaqin qarindoshlari bilan o‘tkazilgan yig‘ilishdan so‘ng 51 nafar qidiruvdagi shaxs o‘z ixtiyori bilan qaytib kelgan. Qidiruvdagi shaxslar o‘z ixtiyori bilan huquqni muhofaza qiluvchi organlariga murojaat qilganliklari inobatga olinib, ularga nisbatan muqaddam qo‘llanilgan “qamoq” tarzidagi ehtiyot choralari o‘zgartirilib, qonunda belgilangan yengillashtiruvchi holatlar qo‘llanilgan.
Izoh (0)