11-mart kuni Oltinko‘l tumani, Sadda mahallasida joylashgan “Ko‘makay orzusi” mas’uliyati cheklangan jamiyati hududida baxtsiz hodisa tufayli yong‘in yuz berdi. Bu haqda viloyat ichki ishlar boshqarmasi yong‘in xavfsizligi boshqarmasi “Daryo”ga xabar berdi.
Ma’lum qilinishicha, 11-mart kuni soat 21:09 da boshqarma Markaziy dispetcherlik xizmatiga Oltinko‘l tumani, Shaxidtepa ko‘chasidan o‘tib ketayotgan fuqarolar tomonidan Sadda mahallasida joylashgan “Ko‘makay orzusi” MChJ hududida yong‘in sodir bo‘layotganligi to‘g‘risida xabar kelib tushgan.
8 daqiqa ichida 12 ta yong‘in o‘chirish avtomobili, 1 ta maxsus avtonarvon voqea joyiga yetib bordi. O‘t o‘chiruvchilarning sa’y-harakatlari bilan 22:35 da yong‘in batamom bartaraf etildi va binoning taxminan 350 kvadrat metr maydoni saqlab qolindi.
Sodir bo‘lgan yong‘in oqibatida jamiyatning 150 kvadrat metr tom (ayvon) qismi, bo‘yoq tayyor mahsulotlari, yengil alangalanuvchi suyuqlik (razbavitel), fuqaro T.S. tegishli bo‘lgan Damas hamda Farg‘ona viloyati, O‘zbekiston tumanida yashovchi R.G‘.ga tegishli MAN rusumli yuk avtomobili yonib zararlangan. Yong‘in oqibatida hech kim jabrlanmagan.
Yong‘in bo‘yoq ishlab chiqarishda ishlatiladigan “Nefraz” mahsulotini 30 tonnalik MAN avtomobilidan to‘kish vaqtida elektr statik tokini razryadlanishi oqibatida kelib chiqqanligi taxmin qilinmoqda. Ayni paytda mazkur holat yuzasidan tergovga qadar tekshiruv ishlari olib borilmoqda.
Eslatib o‘tamiz, 26-fevral kuni Andijon shahar ko‘p tarmoqli markaziy poliklinikasi hududidagi isitish qozonida portlash yuzaga kelishi oqibatida 18 o‘quvchi jarohatlangandi. Shuningdek, 9-mart kuni Andijon viloyati ichki ishlar boshqarmasi yo‘l harakati xavfsizligi boshqarmasi avtoturargohida yonilg‘i to‘kilib ketishi oqibatida yong‘in yuz bergandi.
Izoh (0)