Fevral oyida inflyatsiya 1,6 foizni tashkil qildi
O‘zbekiston iste’mol bozorida tovar va xizmatlar narxi fevral oyida o‘rtacha 1,6 foizga o‘sdi, deb xabar beradi “Gazeta.uz”.
Bir oyda mahsulotlar 1,8 foizga, jumladan, oziq-ovqat mahsulotlar — 2 foizga, nooziq-ovqat mahsulotlari — 1,5 foizga o‘sgan. Xizmatlar 0,8 foizga qimmatlagan. Taqqoslash uchun: 2018-yilning fevral oyida tovarlar narxi 1,2 foizga, xizmatlar — 0,7 foizga o‘sgan.
Oziq-ovqat mahsulotlaridan narxlarning o‘sishida yetakchilik meva va sabzavot mahsulotlariga to‘g‘ri keladi, ular bir oy davomida 4 foizga qimmatlashgan.
Narxlarning o‘sishi bo‘yicha ikkinchi o‘rinni umumiy ovqatlanish sohasi tashkil etadi. Bu yerda ikkinchi oy ketma-ket narxlar 3 foizdan oshgan (yanvar — 3,4 foiz, fevral — 3,3 foiz).
Uchlikni sut mahsulotlari yopib bergan, bu yerda ko‘rsatkich o‘rtacha 3,2 foiz. Sut mahsulotlari narxlarining eng ko‘p o‘sishi fevral oyida Surxondaryo va Jizzax viloyatlarida (4%), eng past ko‘rsatkich Namangan (1,9%)da kuzatilgan.
Go‘sht mahsulotlari, kolbasalar qimmatlagan, parranda go‘shti, aksincha, biroz tushgan.
Alkogol mahsulotlari fevral oyida sezilarli darajada oshgan (2,3%). Shakar, choy, qandolat va boshqa oziq-ovqat mahsulotlari narxi 1,7 foizga oshgan.
Bir oy davomida non mahsulotlari, dukkakli va makaron mahsulotlari 2,4 foizga, mosh — 2,3 foizga, guruch — 1,9 foizga, yopilgan non — 0,5 foizga, bug‘doy uni — 4 foizga oshgan.
Nooziq-ovqat mahsulotlaridan yetakchi o‘rinlarni telekommunikatsiya (9,5%), asosiy uy-ro‘zg‘or buyumlari va elektr asboblari (5,8%), yuvish va tozalash mahsulotlari (5,7%), avtomobil ehtiyot qismlari (2,9%), oshxona anjomlari va asbob-uskunalar (2,2%), maishiy to‘qimachilik (2,1%), kiyim-kechak (1,4%), poyabzal (1%) egallagan.
Qayta import bojxona bojlarini joriy qilish, shuningdek, milliy valyutaning o‘zgaruvchanligi nooziq-ovqat tovarlari asosiy turlarining bahosini o‘sishida muhim omil bo‘lgan.
Markaziy bank ma’lumotlariga ko‘ra, 15-yanvardan 15-fevralgacha bo‘lgan 1 dollar kursi 8356,18 dan 8 395,15 so‘mgacha (+ 0,5%) o‘sgan.
Avtomobil yoqilg‘i mahsulotlari bir oyda 0,1 foizga pasaygan. Propan benzin va metan uchun narx barqarorligi sharoitida 1 foizga arzonlagan.
Tadbirkorlik subyektlarining xarajatlarining o‘sishi xizmatlarning asosiy turlarining qiymatini sezilarli darajada oshishiga olib kelgan.
Maishiy texnikani ta’mirlash xizmatlari narxi 8,1 foizga, avtomobillarni ta’mirlash va texnik xizmat ko‘rsatish 7,6 foizga, vanna va dushga xizmat ko‘rsatish xizmatlari 4,5 foizga, sartaroshxona va go‘zallik salonlarida narxlar 2,4 foizga o‘sgan.
Yo‘lovchi tashish xizmatlari tariflari 0,2 foizga o‘sgan. Taksi xarajatlari Jizzax (13,2%) va Xorazm (2,3%) viloyatlarida va yo‘lovchi taksilarida Toshkentda (4,2%) o‘sgan.
