Dehqonobodda ikki bola ota-onasi o‘rtasidagi kelishmovchilik sabab toqqa qochib ketgan
Qashqadaryo viloyati Dehqonobod tumanining “Terakli” MFY, “Terakli” qishlog‘ida yashovchi opa-uka 12 yoshli Yulduz va 9 yoshli Fayzibek ota-onasi o‘rtasidagi kelishmovchilik sabab toqqa qochib ketgan. Opa-ukalar tuman xotin-qizlar qo‘mitasi raisi Mehri Yo‘ldosheva aralashuvi bilan topilgan. Bu haqda 20-fevral kuni bo‘lib o‘tgan viloyat xotin-qizlar qo‘mitasining matbuot brifingida ma’lum qilindi.
Dehqonobod tuman Xotin-qizlar qo‘mitasi raisi Mehri Yo‘ldoshevaning “Daryo”ga qo‘shimcha qilishicha, asli nishonlik R.B dehqonobodlik qarindoshi B.B ga turmushga chiqib, 5 nafar farzandli bo‘lgan. Yaqin qarindoshlar o‘rtasidagi nikoh sababmi oilaning kenja farzandi nogiron bo‘lib tug‘ilgan. Eng kichik farzand hozirda Qarshi shahridagi “Muruvvat uyi”da tarbiyalanadi. Er-xotin o‘rtasidagi kelishmovchilik sabab, farzandlarni R.B.ning opasi o‘zi yashaydigan Toshkent shahriga olib ketadi va o‘ziga tegishli savdo do‘konlarida ishlatib keladi.
“Bolalar ishdan beziganidanmi yoki otasini sog‘inibmi birin-ketin uyiga qochib keladi, — deydi tuman xotin-qizlar qo‘mitasi raisi Mehri Yo‘ldosheva. — Ona esa 1,5 yildan keyin qaytib kelib, turmush o‘rtog‘i bilan qonuniy ajrashadi. Sud hukmiga ko‘ra ona 2 nafar farzandi Yulduz va Fayzibekni olib ketmoqchi bo‘ladi”.
Ma’lum bo‘lishicha, er-xotin B.B va R.B o‘zaro kelishmovchilik sabab qonuniy ajrashgan bo‘lib, sud hukmiga ko‘ra oilaning 2 nafar farzandi ota, 2 nafar farzandi esa ona qaramog‘iga berilgan.
“Ota farzandlariga onani shu qadar yomon ko‘rsatganki, farzandlarda ona va xolaga nisbatan nafrat kuchayib ketgan, — deydi Mehri Yo‘ldosheva. – Shu sababli ham onasi bilan ketmaslik uchun Yulduz va Fayzibek tog‘dagi archazorga qochib ketgan. Bu ota tomonidan ataylab uyushtirilgan bo‘lishi ham mumkin. Lekin tuman hokimligi vakillari bilan tuman markazidan 180 kilometr uzoqlikda joylashgan qishloqqa borib, opa-ukalarni topdik va oilasiga qaytardik”.
Mehri Yo‘ldoshevaga ko‘ra, ayni kunda ota tuman MIBga olib kelingan va sud ijrosini ta’minlash uchun mas’ul bo‘lgan mutasaddilar tomonidan tushuntirish ishlari olib borilmoqda.
Matbuot brifingida aytilishicha, 2019-yilning o‘tgan ikki oyi mobaynidagi o‘rganishlar natijasida viloyatda 630 ta notinch oila borligi aniqlangan.
