Jizzax viloyatining G‘allaorol tumanida Prezidentning 2018-yil 7-noyabrdagi “Jinoyat-ijroiya qonunchiligini tubdan takomillashtirish chora-tadbirlari to‘g‘risida”gi qarori ijrosiga bag‘ishlangan yig‘ilish bo‘lib o‘tdi. Bu haqda “Xalq so‘zi” xabar berdi.
Tadbirda viloyat ichki ishlar organlari mutasaddilari, huquqni muhofaza qiluvchi idoralar vakillari, mahalla va fuqarolar yig‘inlari raislari hamda mas’ul xodimlari, keng jamoatchilik vakillari, Baxmal va G‘allaorol tumanlarida yashovchi ozodlikdan mahrum qilish bilan bog‘liq bo‘lmagan jazolarni o‘tayotgan yuzdan ortiq mahkum qatnashdi.
Yig‘ilishda jazoni o‘tayotgan fuqarolar bandligini ta’minlashda davlat hamda jamoat tashkilotlari bilan samarali hamkorlik qilinayotgani, mahkumlarga psixologik yordam ko‘rsatilayotgani aytib o‘tildi. Jazoni o‘tayotganlar sud belgilagan cheklovlar va qonun talablariga qat’iy bo‘ysunishi lozimligi uqtirildi.
Tadbir doirasida sayyor sud ham o‘tkazildi. Unda jinoyat ishlari bo‘yicha G‘allaorol tumani sudi tomonidan Baxmal tumanidan 19 nafar, G‘allaorol tumanidan 9 nafar ozodlikdan mahrum qilish bilan bog‘liq bo‘lmagan jazolarni o‘tayotgan mahkum muddatidan oldin javobgarlikdan ozod etildi.
Shuningdek, qonunda belgilangan talablar asosida ozodlikda jazoni o‘tashda qonunbuzilishlarga yo‘l qo‘yganligi aniqlangan va ozodlikdan mahrum qilish bilan bog‘liq bo‘lmagan jazoni o‘tash talab-tartiblariga rioya etmagan Inomjon Abdullayev va Bekzod Rustamovga qamoq jazosi tayinlandi.
Izoh (0)