Respublika ishchi guruhi So‘x va Quva tumanlarida qator kamchiliklarni aniqladi
Hududlardagi ijtimoiy-iqtisodiy ahvol va aholini qiynayotgan muammolarni o‘rganish bo‘yicha Respublika ishchi guruhining Farg‘ona viloyati So‘x va Quva tumanlaridagi faoliyati natijasida qator kamchiliklar aniqlandi. Bu haqda O‘zA xabar bermoqda.
Ularning aksariyatiga joyida yechim topilgan bo‘lsa, xalq deputatlari tuman kengashlari sessiyalarida komissiya ro‘yxatga olgan boshqa muammolarni hal etish yuzasidan “yo‘l xaritasi” belgilab olindi.
To‘rt sektor rahbarlari tomonidan hududlarda bir qator ishlar amalga oshirilayotgan bo‘lsa-da, ba’zi holatlarda muammolardan ko‘z yumilmoqda. Masalan, So‘x tumanidagi o‘rganishlar chog‘ida 345 ta kamchilik va muammo aniqlangan. Ta’lim, tibbiyot, madaniyat sohalarida, joylarda aholiga munosib turmush sharoiti yaratish borasida vujudga kelgan bu masalalarning aksariyati yillar davomida to‘planib qolgan.
Ayniqsa, tumanda sog‘liqni saqlash sohasidagi ishlar qoniqarsiz, aksariyat tibbiyot maskanlari ta’mirga muhtoj, kadrlar yetishmovchiligi yillar davomida hal etilmasdan kelmoqda. Mazkur yo‘nalishda 46 ta muammo aniqlangani ham buni yaqqol ko‘rsatib turibdi. Aholi bandligini ta’minlash, yoshlarni kichik biznes subyektlariga jalb etish, ularning istiqbolli loyihalarini qo‘llab-quvvatlashga e’tibor yetarli darajada emas. “Sebzor”, “Sohibkor”, “Oftobro‘”, “Navobod” mahalla fuqarolari yig‘inlari hozirgi kunga qadar tarmoq asosida ichimlik suvi bilan ta’minlanmagan.
Ishchi guruh tomonidan tumanda 125 ta bo‘sh turgan bino, qurilishi tugallanmagan obyekt va foydalanilmayotgan yer maydonlari aniqlangan. Vaholanki, ularda ko‘plab istiqbolli loyihalarni amalga oshirish, yangi ish o‘rinlari yaratish imkoniyati mavjud. Tumanda aholi turar joylari va xalq xo‘jaligining boshqa tarmoqlarini kuz-qish mavsumiga tayyorlash borasida ham ko‘plab muammolar uchraydi. Ko‘p qavatli uylarga xizmat ko‘rsatuvchi xususiy uy-joy mulkdorlari shirkatlari mavjud emasligi natijasida ko‘p qavatli uylarning kommunal tarmoqlari, yerto‘lasi va fasadlari ta’mirtalab holga kelib qolgan.
Sessiyada mahalliy kengash deputatlari va to‘rtta sektor rahbarlari zimmasiga aniqlangan muammolarni bartaraf etish, xalq ichiga yanada chuqur kirib borish, odamlarning hayotdan roziligiga erishish yo‘lidagi amaliy ishlarni faollashtirish bosh vazifa sifatida yuklatildi.
Quva tumanida ham jiddiy muammolar to‘planib qolgani aholi xonadonlari, ijtimoiy muassasalarga tashrif va fuqarolar bilan yuzma-yuz muloqotlar chog‘ida ma’lum bo‘ldi. Jumladan, ishchi guruh tomonidan 65 ta mahallada uyma-uy yurilib, 2 ming 112 ta muammoli masala aniqlangan. Inson munosib turmush kechirishi uchun qulay turar joy, kommunal vositalar, masalan, kafolatlangan gaz va ichimlik suvi zarur.
Biroq, o‘rganishlar davomida o‘rtaga qo‘yilgan masalalarning 347 tasi tabiiy gaz, 122 tasi ichimlik suvi ta’minoti bilan bog‘liq ekani ayni yo‘nalishdagi yumushlarning haqiqiy ahvolidan darak beradi. Xususan, Sultonobod, O‘raboshi, Soykeldi, Boyiston, Turk, Yuziya mahallalari hozirga qadar ichimlik suvi tarmog‘iga ulanmagan.
Tumanda 76 ta ko‘p qavatli uy bo‘lib, ularda issiqlik ta’minoti, markazlashgan qozonxonalar va magistral tarmoqlar mavjud emas. Tuman markazidagi 17 kilometrlik oqova suv tarmog‘i va suv tozalash inshooti ta’mirga muhtoj.
Sessiyada kun tartibidagi masalalar yuzasidan tegishli qarorlar qabul qilindi.
