Tarazlik yigit o‘zbekistonlik mehmonga qozoq taomlari restoranini topib berolmay, uyalib qoldi

Qozog‘istonning Taraz shahri fuqarosi O‘zbekistondan kelgan mehmon, qadrdon do‘stining oldida uyalib qoldi, deb yozadi Tengrinews.

Ma’lum bo‘lishicha, mehmonga qadimiy shahardagi turli yodgorlik va obidalarni ko‘rsatishgan, ko‘ngilochar maskanlarga olib borishgan. Ammo do‘sti uni qozoq milliy taomlari bilan mehmon qilishni so‘raganida mezbon noqulay vaziyatga tushib qolgan.

“Ona shahrimni besh qo‘limday yaxshi bilaman, biroq umrim bo‘yi bu yerda milliy uslubda bezatilgan, qozoq taomlari tayyorlanadigan restoran yoki kafeni ko‘rmaganman. Ammo shaharda o‘zbek palovi, yapon sushisi, kavkaz kaboblari pishiriladigan joylar tiqilib yotibdi. Qozoqcha taom yeyish uchun esa uyga kelishga majbur bo‘lamiz”, — dedi tarazlik yigit.

Xabarda ta’kidlanishicha, shaharga keladigan sayyohlar Yevropa yoki Sharq taomlari emas, qozoq taomlarini qidiradi. “Qozoq oshxonasi turli noz-ne’matlarga boy, afsuski ularning ko‘pchiligi unutilib ketgan”, —deyiladi xabarda.